Pas 30 vjetësh – Rihapet eksporti i të imtave dhe mishit të tyre

Për herë të parë pas viteve ’90 është hapur eksporti i dhenëve dhe dhive dhe mishit të tyre nga Shqipëria drejt Serbisë.  Dakordësia për hapjen e këtij tregu është rënë mes takimit të delegacionit të Republikës së Serbisë me Ministrinë e Bujqësisë, Pyjeve dhe Menaxhimit të Ujërave, të kryesuar Ministri Niko Peleshi.

“Në këtë takim u ra dakord që duke respektuar kërkesat dhe standardet shëndetësore të të dy vendeve, të përgatiten të gjitha procedurat ligjore që do të mundësojnë që shkëmbimet tregtare ndërmjet vendeve tona të përfshijnë edhe eksportin nga Republika e Shqipërisë në Republikën e Serbisë të kafshëve të gjalla të llojit dhen dhe dhi, mishit të freskët të tyre”, thuhet në njoftim.

Në vijim të dakortësisë ndërmjet dy delegacioneve, pas negocimeve të shumta me palën serbe, është rënë dakord për modelin e certifikatës shëndetësore për eksport nga Republika e Shqipërisë në Republikën e Serbisë të mishit të dhenëve dhe dhive si dhe të certifikatës shëndetësore për eksport të kafshëve të gjalla të llojit dhen dhe dhi.

“Jemi njoftuar nga autoritetet Serbe se, aktualisht, certifikatat shëndetësore për eksportin nga Republika e Shqipërisë për kafshët e gjalla dhen dhe dhi dhe mishin e tyre janë fuqi dhe përcjellë në pikat inspektimit kufitar të Serbisë. Në këtë mënyrë konsiderohet që eksporti i tyre është i hapur dhe ngarkesat mund të nisen në çdo kohë”.

Deri më sot, i gjithë prodhimi i blegtorëve shqiptarë ishte i dedikuar vetëm për tregun e brendshëm. Nga sot, këtij tregu i shtohet edhe një treg tjetër prej rreth 7 milionë banorësh siç është ai i Serbisë.

Gjedhi në vendin tonë rritet kryesisht në kullotë të lirë, çka e bën këtë produkt akoma më tërheqës për tregun serb, i cili sot furnizohet kryesisht nga vende që shumicën e mbarështimit e realizojnë me anën e rritjes intensive.

Në Shqipëri mbarështohen rreth 3.000.000 të imta të cilat çdo vit lindin rreth 2.400.000 qengja dhe keca vetëm për therje. Këta qengja në therje janë me një mesatare 10-15 kg mish për krerë, një vlerë ekonomike në total 25,2 miliard Lekë ose rreth 191 milion Euro. Është hera e parë pas vitit 1990 që do të eksportohen kafshë të gjalla të llojit të imta ose mishi i tyre drejt një vendi të huaj.

Ky është hapi i parë drejt objektivit kryesor të Ministrisë së Bujqësisë dhe Zhvillimit Rural, çeljes së eksporteve drejt Bashkimit Europian.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.