Pasuritë e gjyqtarëve dhe prokurorëve – Kryeprokurorja e Pukës shpjegime për dy hua me vlerë 20 mijë USD nga SHBA

Elidiana Kasa, drejtuese e Prokurorisë së Rrethit gjyqësor Pukë është paraqitur të hënën përpara Komisionit të Pavarur të Kualifikimit për t’ju nënshtruar Vetting-ut.

Ajo kaloi në sitën e Komisionit për të tre komponentët, pasurinë, integritetin e aftësitë profesionale. Kryeprokurorja e Pukës kishte marrë vlerësime pozitive më herët si nga IDKPKI për pasurinë, nga DSIK  për integritetin e lidhjet e papërshtatshme, si dhe nga Prokuroria e Përgjithshme për aftësitë profesionale.

Pika e vetme për të cilën Kasa duhej të jepte shpjegime ishte një apartament në Kashar,  blerë në vitin 2002 për 37 mijë euro. Për blerjen e kësaj prone Kasa ishte mbështetur te dy hua përkatësisht 12 mijë dollarë dhe 8 mijë dollarë të marra nga kunata dhe kunati në Shtetet e Bashkuara të Amerikës. Ndërkaq Kasa ka paraqitur përpara Komisionit dokumentet e nevojshme për të vërtetuar se të afërmit zotëronin burimet financiare për këto shuma ashtu si dhe vërtetimet e kalimit të shumave. Ajo dhe familja e saj justifikonin me burime financiare pasuritë e tjera që përbëheshin nga një apartament dhe një tokë arë në Pukë, një automjet dhe disa depozita e llogari bankare.

Gjithsesi duhet pritur në vijim për të mësuar vendimin e Komisionit të Pavarur të Kualifikimit për shkarkimin apo konfirmimin e saj në detyrë.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.