Pensionet private – Numri i kontribuesve arrin në 22 mijë

Numri i anëtarëve të fondeve të pensioneve private ka arritur në afro 22 mijë. Sipas të dhënave nga Autoriteti i Mbikëqyrjes Financiare, në tre muajt e parë të këtij viti numri i kontribuesve është shtuar me rreth një mijë individë ose afërsisht 5%. Rritja e numrit të anëtarëve po udhëhiqet sidomos nga fondi Credins Pensions, që ka arritur në afro 13 mijë kontribues dhe mban mbi 58% të tregut, sipas numrit të anëtarëve. Në vlerë, tregu ende ngelet në përmasa modeste, por me rritje të qëndrueshme.

Totali i aktiveve të fondeve të pensioneve në fund të muajit mars arriti në 1.9 miliardë lekë, me një rritje prej 10% krahasuar me fundin e vitit 2017. Kontributet në fondet e pensioneve private investohen pothuajse tërësisht në bono dhe obligacione të qeverisë shqiptare, me një rrezik investimi 0. Për nga totali i aktiveve, kompania më e madhe është Sigal Pensions, me 49% të tregut. Në vitet e fundit, normat e ulëta të interesit të depozitave kanë bërë që më shumë individë të preferojnë t’i kanalizojnë kursimet në produkte alternative, siç janë pensionet private.

Për të investuar në një pension privat, ligjërisht, ka edhe disa incentiva fiskale, megjithëse përfitimi në praktikë i  tyre shpeshherë është i vështirë. Nxitja e tregut të pensioneve private është një nga prioritetet në strategjinë e re të AMF për zhvillimin e tregjeve nën mbikëqyrje.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.