Personat me Aftësi të Kufizuar, udhëzimi i ri për përfitimin e pagesave. Kriteret si përfitojnë kujdestarët, formularët dhe dokumentet

Publikohet udhëzimi i ri për dokumentet dhe kriteret e përfitimit të pagesë së aftësisë së kufizuar dhe për ndihmësit personal. Gjithashtu udhëzimi specifikon edhe rregullat dhe detyrat që duhet të ndjekin strukturat përgjegjëse në zonat pilot.

Njëkohësisht në udhëzimin e publikuar në “Fletoren Zyrtare”  janë publikuar edhe formularët që duhet të plotësojnë personat.

Sipas Udhëzimit të ri në vlerësimin bio-psiko-social të aftësisë së kufizuar që do të pilotohet në njësitë administrative nr. 6 dhe nr. 7, të qarkut të Tiranës, nëpërmjet përdorimit të Regjistrit Elektronik Kombëtar do të përfshihen individët që kërkojnë të vlerësohen për herë të parë; si dhe individët që kërkojnë të rivlerësohen, të cilët kanë përfituar pagesë të aftësisë së kufizuar sipas legjislacionit në fuqi.

“Personi i cili plotëson kriteret sipas pikës 1 të kreut II të vendimit nr. 431, datë 8.6.2016 të Këshillit të Ministrave ka të drejtën t’i drejtohet për vlerësim komisionit shumëdisiplinor të vlerësimit të aftësisë të kufizuar. Çdo individ i cili pretendon të vlerësohet për aftësi të kufizuar nga komisioni shumëdisiplinor i vlerësimit të aftësisë së kufizuar duhet të paraqitet pranë strukturave shëndetësore për të kryer vizitë mjekësore dhe ekzaminimet e nevojshme, fillimisht pranë mjekut të familjes dhe më pas referohet pranë mjekut specialist. Mjeku i familjes në qendrën e kujdesit shëndetësor parësor plotëson formularin nr. 1 për të rritur ose formularin nr. 2 për fëmijë, sipas anekseve bashkëlidhur këtij udhëzimi. Mjeku specialist pranë qendrës shëndetësore të specialiteteve/Qendrës Komunitare të Shëndetit Mendor/Qendrës Kombëtare të Mirërritjes, Zhvillimit dhe Rehabilitimit të Fëmijëve plotëson në mënyrë të pavarur të njëjtët formularë me ato të mjekut të familjes, formularin nr. 1 për të rritur ose formularin nr. 2 për fëmijë sipas anekseve bashkë lidhur këtij udhëzimi”

Dokumentet

Individi që kërkon të vlerësohet për aftësi të kufizuar apo kujdestari i tij ligjor, dorëzon pranë Komisionit Shumëdisiplinor dokumentacionin e mëposhtëm:

a) formularin e plotësuar nga mjeku i familjes;

b) formularin e plotësuar nga mjeku specialist;

c) formularin e aplikimit të plotësuar nga vetë individi apo kujdestari i tij ligjor, për vlerësimin e

përcaktimit të aftësisë së kufizuar sipas aneksit nr. 3, bashkëlidhur këtij udhëzimi;

ç) ekzaminimet mjekësore;

d) kopjen e kartës së identitetit/certifikatën personale.

Punonjësi i komisionit shumëdisiplinor të vlerësimit të aftësisë së kufizuar kryen detyrat e mëposhtme:

a) hedh të dhënat e aplikantit dhe të gjithë dokumentacionin e përcaktuar në pikën 6 të këtij udhëzimi në regjistrin elektronik kombëtar të aftësisë së kufizuar;

b) Verifikon të dhënat e marra nëpërmjet Regjistrit Elektronik Kombëtar për aplikantin dhe kur nuk është e mundur verifikon në mënyrë manuale me institucione të tjera të cilat duhet të kthejnë përgjigje brenda 10 ditëve dhe hedh këto të dhëna në Regjistrin Elektronik Kombëtar;

c) kur vëren se dokumentacioni nuk është i plotë apo nevojiten ekzaminim shtesë e kthen atë për plotësim, në rast të kundërt cakton datën e intervistës brenda 30 (tridhjetë) ditëve kalendarike nga data e marrjes së dokumenteve të aplikimit apo në një afat më të shkurtër për rastet për të cilat kërkohet procedurë e përshpejtuar dhe njofton zyrtarisht aplikuesin.

“Individi duhet të paraqitet pranë komisionit shumëdisiplinor të vlerësimit të aftësisë së kufizuar për të kryer intervistën në datën dhe orën e përcaktuar nga ky komision. Për rastet kur mos-paraqitja ka ndodhur për shkaqe të arsyeshme si shëndetësore apo fatkeqësi, data e intervistës do të përcaktohet në afatin më të afërt por jo më shumë se 30 (tridhjetë) ditë nga dita që është provuar shkaku i mosparaqitjes. Individi njoftohet me shkrim në lidhje me vendimin e komisionit, procedurat dhe afatet e ankimimit, afatin e dorëzimit të dokumentit që vërteton kryerjen e kontrollit vjetor dhe pajiset me certifikatën e aftësisë së kufizuar e cila përmban të dhëna mbi vlerësimin bio-psiko-social, përfitimet, rekomandime për shërbime, kohëzgjatjen, etj.” thuhet në udhëzim.

Ankimimi

Aplikuesi ka të drejtën e ankimimit sipas përcaktimeve në kreun V të vendimit nr. 431, datë 8.6.2016. Komisioni shumëdisiplinor i vlerësimit të aftësisë së kufizuar hedh të dhënat në Regjistrin Elektronik Kombëtar dhe njofton ankimuesin mbi vendimin e marrë nga rishqyrtimi i ankesës.

“Për rastet kur ka një vendim të formës së prerë të Gjykatës Administrative, komisioni shumëdisiplinor i vlerësimit të aftësisë së kufizuar hedh të dhënat në Regjistrin Elektronik Kombëtar dhe për rastet kur kërkesa është pranuar personit i lindë e drejta e marrjes së përfitimeve që nga muaji pasardhës nga data e marrjes së vendimit për refuzim nga komisioni ose sipas përcaktimeve në vendimin e gjykatës”, thuhet më tej.

Për t’u informuar mbi kriteret, dokumentet dhe formularët që duhet të përgatitni, klikoni këtu

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.