Përzgjidhen këshilltarët e Eurobondit /Ministria e Financave publikon emrat, 500 mln euro emetohen brenda vitit

Qeveria shqiptare do të emetojë brenda vitit në tregjet ndërkombëtare një Eurobond të ri prej 500 milionë eurosh. Ministria e Financave ka shpallur  bankat fituese që janë përzgjedhur si  Menaxherë Bashkëdrejtues (Lead Managers) që do drejtojnë procesin e emetimit të këtij mekanizmi financiar në tregun ndërkombëtar.

Sipas njoftimit zyrtar të Financave, janë shpallur fituese propozimet e paraqitura nga:  JP Morgan;  Societe Generale;  Banca IMI &  OTP duke i përzgjedhur ato si Bashkë-rregullues Kryesor (Joint Lead Managers) për të drejtuar procesin e emetimit nga Republika e Shqipërisë të Eurobondit në tregun ndërkombëtar. Ministria e Financave bën me dije se vlerësimi i propozimeve u bë mbi bazën e:  Eksperiencës së institucioneve në transaksione të ngjashme, prezencën e tyre në tregje dhe kapacitetin për sigurimin e financimit të kërkuar;  Risqeve të ndryshme që mbart secili prej propozimeve;  Kostos më të ulët efektive me të gjitha elementet e saj si:  Afati i maturimit; Mënyra e shlyerjes; Komisionet, interesi dhe faktorë të tjerë që ndikojnë në koston e huamarrjes në varësi të kushteve të tregut.

Në kërkesën për propozime, dikasteri nënvizonte se, qëllimi është që eurobondi të emetohet në gjysmën e dytë të këtij viti, në rast se kushtet e tregjeve do të jenë të favorshme, në të kundërt, do të shtyhet për në muajt e parë të vitit të ardhshëm. Afati i maturimit, i kërkuar për eurobondin e ri do të jetë mes 7 dhe 10 viteve.

Institucionet financiare fituese

JP Morgan

Societe Generale

Banca IMI

OTP

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.