Posta Shqiptare shpall tenderin, fondi 27 milionë lekë – Çfarë është sistemi “Eterna”?

Posta Shqiptare ka njoftuar shpalljen e një tenderi me fond 27 milionë lekë, i cili do të shkojë për mirëmbajtjen e sistemit “Eterna” për 3 vite.

“Objekti kryesor i këtij shërbimi, është mirëmbajtja e sistemeve Eterna-Financiare dhe Eterna Postare, me qëllim sigurimin e vazhdimësisë së punës në të gjitha zyrat postare në të cilat është instaluar ky sistem” shpjegohet në specifikimet teknike të tenderit.

Eterna Financiare është një program që mbulon të gjitha aktivitetet e një institucioni financiar në kohë reale, mbështetur mbi infrastrukturën e rrjetit të degëve dhe rolet administrative.

Nga ana tjetër, Eterna Postare është një program që mbulon të gjitha proçeset e shërbimeve postare dhe rolet përgjegjës për këto proçese, që nga momenti i pranimit të objektit postar, e deri tek dorëzimi në destinacion.

Për të gjithë aplikantët  e interesuar, tenderi do të qëndrojë i hapur në Agjencinë e Prokurimit Publik deri më 17 prill, ora 10:00.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.