Profesionet e lira, Gjykata vendos për tatimin dhe kontributet – Pa TVSH deri në 5 mln lekë xhiro në vit
Kolegji Administrativ i Gjykatës së Lartë vendosi për rrëzimin e pjesshëm të vendimit të qeverisë, i cili përcaktonte se profesionet e lira do të duhet të paguanin Tatim mbi Vlerën e Shtuar.
Në vendimin e dhënë së fundmi, trupa vendosi që pagesa të kryhet vetëm nga ata që kanë një xhiro vjetore mbi 5 milionë lekë.
Ishte Dhoma Kombëtare e Avokatisë që kishte dërguar çështjen në Gjykatën e Lartë, duke kundërshtuar VKM nr. 953.
Sipas kësaj dhome ligji parashikonte pagesën e TVSH-së prej 20% pavarësisht xhiros vjetore, ndërsa për bizneset në tërësi kjo aplikohej vetëm për xhirot vjetore mbi 5 milionë lekë.
Tashmë pas këtij vendimi, vetëm ata avokatë apo zyra avokatie do të faturojnë shërbimet e tyre duke llogaritur edhe TVSH prej 20%, ndërsa për pjesën tjetër shërbimi do të faturohet me faturë të thjeshtë tatimore.
Gjykata shfuqizoi një tjetër vendim të rëndësishëm dhe që krijoi shumë pakënaqësi mes profesionistëve të lirë, atë të pagesës së kontributeve shoqërore e shëndetësore në masën 27% të xhiros vjetore.
Ky vendim prekte të gjithë personat e regjistruar si të vetëpunësuar, të cilët ushtrojnë veprimtarinë ekonomike profesionale, si edhe punonjësit e papaguar që punojnë e bashkëjetojnë me ta.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.