Projekti për “Bashki të forta”, Kuko: Do të krijohen njësi të posaçme për statistikat vendore
Çdo bashki në vend do të ketë një strukture të posaçme për prodhimin e statistikave zyrtare dhe krijimin e administratës me role të reja. Është ky synimi i zbatimit të projektit “Bashki të Forta “ i nënshkruar mes qeverisë shqiptare dhe asaj Zvicerane, i cili u miratua në parim nga komisioni për Veprimtarinë prodhuese, Tregtinë dhe Mjedisin. Sipas zv/ministres së Brendshme Romina Kuko , projekti ndihmon në avancimin e reformës administrative-territoriale .
“Është për të ndihmuar Bashkitë për të prodhuar së pari dhe më pas për të plotësuar kuadrin me të dhëna që vijnë nga niveli vendor. E dyta ka të bëjë me krijimin e administratës vendore performuese. Ne e dimë që pas reformës territoriale patëm bashkim dhe zgjerim territoresh të bashkive, që do të thotë një administratë që duhet të performojë në role të reja dhe me një filozofi tjetër, jo vetëm në pjesën e administrimit, por gjithashtu edhe në pjesën e ekspertizës që duhet të kishte në funksione të deleguara.
Zv/Ministrja shtoi më tej dhe impaktin që ka ky projekt në përmirësimin e shërbimit për trajtimin e mbetjeve në cso bashki
“Aktualisht projekti është duke ndihmuar Bashkitë me praktika të mira për të gjetur mënyrat e menaxhimit të këtyre mbetjeve. Pra, është duke fuqizuar dhe duke krijuar kapacitetet e Bashkive dhe stafeve të tyre për të gjetur mënyrat më eficente dhe praktike për pjesën e mbetjeve. ”
Projekti “Bashki të Forta “ financohet në vlerën e 11 milion euro dhe pritet të zbatohet brenda 5 viteve të ardhshme.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.