Projekti për tatim progresiv për çdo të ardhur e jo vetëm për pagat! Malaj në “Argument”: Model i së ardhmes por “duhet më shumë frymëmarrje në kohë”

Gjatë diskutimit në Kuvend të buxhetit dhe paketës fiskale të vitit të ardhshëm, Ministri i Financave Arben Ahmetaj bëri publike idenë e tatimit progresiv të integruar të të ardhurave. Kjo nënkupton se të gjitha të ardhurat e individit (paga+ të ardhurat nga dividenti+të ardhurat nga qeratë si dhe çdo e ardhur tjetër) të tatohen në total në përqindjen e përcaktuar në shkallën e tatimit progresiv. Me formulën aktuale, këto të ardhura mund të tatohen në masën 23 %. Kjo nënkupton se disa të ardhura që aktualisht tatohen në masën 10% apo 15% do të tatohen më shumë.

Por si e vlerëson ish ministri i Financave Arben Malaj një masë të tillë? I ftuar në emisionin “Argument” të gazetarit Enio Civici, Malaj u shpreh se një model i tillë i tatimit mbi të ardhurat është një model që i përket së ardhmes dhe që duhet të aplikohet në Shqipëri. Megjithatë, sipas tij, për një model të tillë “duhet pak më shumë frymëmarrje në kohë”. Në kushtet aktuale, sipas Malajt, tatimi mbi të ardhurat përmban një kontarditkë për faktin se realisht skema aplikohet vetëm për pagat.

“Duke kaluar në këtë lloj tatimi na duhet pak më shumë frymamërrje në kohë që të respektohet nga të gjithë. Sepse do të respektohet nga çde individ, pavarësisht nga statusi shoqëror dhe çdo të ardhur duhet ta raportojë, të ardhurat nga biznesi, paga e të gjitha llojet e të ardhurave.  Mund të ketë shtëpi me qira e gjëra të ndryshme. Edhe dhuratat po t’i bëhen atij, ai do të tatohet dhe do ta pasqyrojë si të ardhura nga dhurata. Pra, të gjitha të ardhurat pa përjashtim grupohen aty dhe aplikohet sistemi i tatimit që kemi për për pagat. Unë besoj ky lloj tatimi që integron të gjitha të ardhurat i përket se ardhmes dhe duhet startuar por koha duhet të jetë me gjatë për shtrirjen” u shpreh Malaj.

Madje, sipas tij, tashmë është koha për të reflektuar për masën e taksimit tëpagave të larta për faktin se kjo ka rezultuar pengesë edhe për investimet e huaja. Malaj solli rastin e kompanive të huaja, të cilave u janë larguar specialistët e huaj për shkak të nivelit të lartë të taksimit të pagës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.