Projekti pilot/ ‘Pemë fotovoltaike’ dhe stacione karikimi për makinat elektrike! Në Shkodër, drejt ndërtimit “Rruga e Energjisë së Pastër”. Detajet

Agjencia për Efiçencën e Energjisë ka shpallur tenderin me objekt:Audit,çertifikim,hartim projekt zbatimi dhe realizim punimesh për vendosjen e sistemit të ndricimit me efiçencë të lartë të energjisë,stacioneve të parkimit të makinave elektrike,paneleve fotovoltaik,në Unazën Lindore dhe Perëndimore në qytetin e Shkodrës”. Fondi limit për këtë tender është 45 milionë lekë dhe afati për dorëzimin e ofertave është 16 maj 2022.

“Projekti që Agjencia për Efiçencën e Energjisë do të zhvillojë konsiston në një projekt pilot ku do të ndërhyhet në segmentin lindor dhe perëndimor të unazës së qytetit të Shkodrës. Sistemi i ndriçimit ku do ndërhyhet paraqesin një situate të amortizuar.

Objektivi i këtij projekti pilot është realizimi i të gjitha fazave të projektimit dhe realizimit të zbatimit të punimeve të cilat do të reflektojnë një ulje të konsumit të energjisë, rritje të cilësisë së ndricimit dhe uljes së kostove të mirëmbajtjes.

Objektivi i dytë kryesor është ofrimi e insfrastrukturës për stacionet e karikimit të makinave elektrike gjithashtu dhe pemëve fotovoltaike si një mënyrë për nxitjen e elektrifikimit të transportit rrugor, i cili është dhe ndotësi kryesor i CO2 në Shqipëri.

Kjo do ndikonte drejpërdrejti në uljen e emetimeve dhe arritjen e objektivave të përcaktuara në Planin Kombëtar për Energjinë dhe Klimën. Objektivi i tretë është rritja e cilësisë së jetesës për qytetarëve nëpërmjet demonstrimit në praktikë të ndërhyrjeve për përmirësimin e efiçencës së energjisë. Ky projekt pilot mund ti hapë rrugë një efekti domino dhe të nxisë vazhdimësinë e këtij procesi” shkruhet në dokumentet e tenderit, raporton SCAN.

Të tre fazat e projektit parashikohet të zhvillohen për 11 muaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.