Qeveria do të shpallë gjendjen e jashtëzakonshme edhe në Lezhë, Rama në terren: “Përsëris lutjen për durim”
Kryeministri Edi Rama ka qenë pasditen e sotme në Lezhë ku ka parë nga afër situatën në disa pallate e objekte të dëmtuara nga tërmeti. Pas Tiranës, Durrësit dhe Laçit nesër qeveria do të shpallë gjendjen e jashtëzakonshme edhe në Lezhë. Lajmin e njoftoinë një postim në rrjetet sociale, ndërsa vendimi pritet që të merret nesër në mbledhjen e mëngjesit të qeverisë. Kreu i qeverisë thotë se kjo që i ndodhi Shqipërisë është një sprovë që tundi tokën shqiptare dhe na këputi në shpirt e në trup.
“Lezhë – Nesër edhe Lezhën do ta përfshijmë në perimetrin e statusit të veçantë të Gjendjes së Jashtëzakonshme nga Emergjenca Natyrore!
PËRSËRIS LUTJEN PËR DURIM🙏
Kjo që na ka rënë në kurriz nuk është as shaka, as film, as sfidë e zakonshme e këtij shteti me trup ende të paformuar sa duhet!
KJO ËSHTË SPROVË QË TUNDI TOKËN SHQIPTARE dhe na këputi në shpirt e në trup!
Prandaj GISHTIN KOKËS TË GJITHË SË BASHKU dhe O IA DALIM BASHKË O HAJËR NUK BËJMË më kurrë!”, shkruan kreu i qeverisë
Në Bashkinë e Lezhës tërmeti i 26 nëntorit ka lënë pas mjaft pasoja. Deri tani raportohet për 760 banesa të dëmtuara mes tyre dhe shumë pallate brenda qytetit. Nga verifikimet që janë bërë deri më tani nga grupet e punës së bashkisë rezulton se 81 banesa janë të pabanueshme mes të cilëve dhe dy pallate, duke lënë të pastrehë qindra banorë.
Situata më problematike paraqitet brenda qytetit të Lezhës ku janë rreth 48 objekte të dëmtuara mes tyre dhe godina të institucioneve shtetërore. Kjo situata ka detyruar qeverinë që të shpallë edhe në Lezhë gjendjen e jashtëzakonshme sipas burimeve zyrtare nga Bashkia Lezhë.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.