Rama: Çmimi i energjisë për familjarët dhe biznesin e vogël nuk ndryshon, kostot do t’i përballojë shteti!
OSHEE ka publikuar informacionin se sipas fjalës së Kryeministrit Rama në kuvend për projektbuxhetin e vitit 2022, qeveria nuk do të ndryshojë çmimin e energjisë elektrike për abonentët familjarë dhe biznesin e vogël dhe se të gjitha kostot e parashikuara për mbulimin e këtij financimi do të përballohen nga buxheti i shtetit.
Sipas informacionit duke iu referuar situatës së krijuar në vendet e rajonit si pasojë e krizës energjetike, kryeministri Rama tha se ata që po përballojnë koston e kësaj krize janë familjarët të cilët po paguajnë me tarifë më të lartë gazin dhe energjinë elektrike.
“Mbase shumëkush bën sikur nuk i sheh, sepse kështu i intereson ato që po ndodhin me çmimin e energjisë përreth, mbase shumëkush nuk do që ti shohë se çfarë po ndodh me konsumatorët familjarë jo shumë larg nesh, ku debati kryesor është kostoja e stërngritur e ngrohjes për familjarët, por po i referohem Italisë, Greqisë e vendet e tjera rrotull që po përballen me rritje të lartë të çmimit të energjisë për familjarët e bizneset e vogla”, tha Rama.
Më tej ai theksoi se siç është premtuar qeveria do të mbrojë familjet dhe biznesin e vogël nga efektet e krizës energjetike.
“Do t’i qëndrojmë fort bindjes se do të jemi mburojë për familjet dhe për biznesin e vogël në raport me çmimin. Ne do të vazhdojmë të mbajmë çmimin aktual të energjisë duke financuar për të kompensuar të gjithë koston, që është kosto që i faturohet arkës së shtetit dhe duke shpresuar se siç janë parashikimet në gjashtëmujorin e dytë të vitit të ardhshëm, vala e krizës do të zbutet”, u shpreh ai.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.