Rama: Kriptovalutat, po mendojmë për një kuadër rregullator! Gatishmëri për t’u kthyer në vend pritës për investitorë potencialë
Shqipëria po bëhet gati që të miratojë një kuadër rregullator për kriptovalutat. Lajmin e bëri të ditur kryeministri Edi Rama gjatë ceremonisë së nisjes së punimeve për seksionin detar të gazsjellësit TAP. Kryeministri tha se tashmë qeveria shqiptare është në një proces vlerësimi pune për hartimin e këtij kuadri rregullator dhe se është bërë një analizë që shoqërohet nga një studim i thelluar. Kjo sipas kryeministrit, do të krijojë mundësinë e eksplorimit të një mundësie të re për të qenë inovativë, dhe për të krijuar një pikë graviteti atraktive për tregjet financiare.
“Për të krijuar tregje të reja perspektive për vendet pune që paguhen shumë më mirë, për njerëzit e kualifikuar dhe më profesione të ndryshme në sektorë që janë tejet të zhvilluara apo në rrugën e zhvillimit sot në botën ku jetojmë jemi duke eksploruar edhe mundësinë e krijimit të një kuadri rregullator për kriptovalutën që është një risi shokuese në botën e sotme dhe ku mundësia për të qenë inovativë dhe për të krijuar një pikë graviteti atraktive për tregjet financiare me një inovacion është e hapur për të gjitha vendet pavarësisht sa të zhvilluara janë.
Për momentin jemi në një proces vlerësimi pune për hartimin e kuadrit rregullator pasi i kemi bërë një analizë dhe një studim të thelluar dhe nëse rezultatet do të jenë të kënaqshme ne do të promovojmë dhe përtej kufinjve të Shqipëri gatishmërinë për t’u bërë një vend pritës për investitorët e shumtë potencialë që synojnë të përfshihen në këtë revolucion të financave globale” tha Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.