Reagon ministrja Xhaçka në lidhje me lajmin e publikuar nga media angleze – ‘Nuk ka patur ndonjëherë bisedime për një ide të tillë’

Nëpërmjet një njoftimi të publikuar në faqen zyrtare ministrja për Europën dhe Punët e Jashtme, Olta Xhaçka ka reaguar në lidhje me lajmin e publikuar nga “The Sun” duke përgënjeshtruar lajmin se në Shqipëri mund të ngrihet një qendër për strehimin e azilantëve nga vende të treta.

“As ka e as ka patur ndonjëherë bisedime për një ide të tillë. E turpshme sajesa e një lajmi të rremë si ky nga mediat angleze”, është shprehur ministrja.

“Ne jemi krenarë për strehimin e 4000 refugjatëve afganë, çka e kemi bërë në sy të gjithë botës, por nuk do të kthehemi kurrë në një qendër, ku vende, ku e ku më të mëdha e më të pasura se ne të deportojnë azilantët e tyre” shton ajo.

“Kam instruktuar përfaqësinë tonë diplomatike në Angli të kërkojë përgënjeshtrimin e menjëhershëm të këtij lajmi të rremë” ka thënë Xhaçka

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.