Rehabilitimi i Morinë-Vërmicës – Doganat hapin garën, vënë në dispozicion fondin prej 84 milionë lekësh
Drejtoria e Përgjithshme e Doganave ka hapur të martën zyrtarisht garën për fazën e dytë të ndërtimit të pikës së re të kalimit kufitar Morinë-Vërmicë, e cila do të zëvendësojë godinën aktuale.
Punimet pritet të zgjasin 8 muaj dhe fondi i vënë në dispozicion nga Doganat është prej 84 milionë e 874 mijë lekësh, ose rreth 638 mijë euro. Drejtoria e Përgjitshme e Doganave specifikon se strukturat ekzistuese duhet të mbahen në punë të vazhdueshme gjatë gjithë periudhës së ndërtimit.
Sipas dokumenteve të bashkëngjitura në njoftimin në faqen e Agjencisë së Prokurimeve Publike, këto punime, ndër të tjera, parashikojnë:
- Shembjen e një godine ekzistuese;
- Heqjen e një ure ekzistuese;
- Heqjen e pjesshme të një strehe e cila do të zgjerohet;
- Heqjen e plotë të kabinave ekzistuese për ri-projektimin total të zonës së kontrollit të mjeteve;
- Rinovimin e ndërtesës ekzistuese të administratës për të plotësuar shërbimet e Pikës së Përbashkët të Kalimit Kufitar;
- Rinovimin e godinës së pritjes ekzistuese me qëllim shtimin e zyrave dhe dhomave të reja teknike;
- Ndërtimi i një godine të re për administratën;
- Ndërtimi i një terminali të ri të autobusave me destinacion Shqipërinë;
- Ndërtimi i një terminali të ri të autobusave me destinacion Kosovën;
- Ndërtimi i një godine të re për inspektimin dhe shkarkimin;
- Implementimin e rrjeteve të reja: elektrik, IT, uji i pastër, uji i ndotur, uji i shiut, ngrohje ventilim (HVAC).
Afati kohor për dorëzimin e ofertave është caktuar 24 Gushti 2017, datë pas të cilës do të nisë edhe hapja dhe shqyrtimi i ofertave. Nga operatorët që plotësojnë kriteret e vendosura nga Drejtoria e Përgjithshme e Doganave do të përzgjidhet ai që do të ketë bërë ofertën me çmimin më të ulët.
Dogana e Morinë-Vërmicës është pika e kalimit mes Shqipërisë dhe Kosovës me fluksin më të madh, sidomos gjatë sezonit veror. Ajo lidh Kukësin me Prizrenin dhe bashkon rrugën e Kombit me autostradën Ibrahim Rugova.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.