Rëndohen financat e OSHEE-së – ERE rrëzon ankesën e Operatorit mbi korrigjimin e faturave për disbalancat

Pas mbylljes me një bilanc negativ prej 1.2 miliard lekësh, situata financiare e Operatorit të Shpërndarjes së Energjisë Elektrike pritet të rëndohet edhe më tej për shkak të korrigjimit të faturave që do të kryhen nga KESH dhe OST për disbalancat e energjisë elektrike. Pavarësisht se OSHEE ankimoi vendimin e Entit Rregullator të Energjisë, ky i fundit ka vendosur të rrëzojë ankesën, çka do të thotë se impakti financiar do të reflektohet te Operatori i Shpërndarjes.

Problematika e disbalancave shtrihet në periudhën 1 korrik 2016 – dhjetor 2017 pikërisht në periudhën kur OSHEE është bërë palë përgjegjëse për balancim në bazë të ligjit. Ajo është shkaktuar nga Prodhuesit me Përparësi të Energjisë të lidhur në rrjetin e transmetimit dhe atë të shpërndarjes të cilët nuk janë subjekt i disbalancave, por të gjithë energjinë e prodhuar kanë të drejtë t’a shesin tek OSHEE. Sipas një tabele ilustruese të paraqitur në herët nga OST evidentoheshin disbalancat artificiale pozitive, ku realisht OSHEE nuk kishte injektuar fizikisht energji në rrjet, duke i krijuar KESH-it diferenca në bilancin financiar.

Sipas kësaj tabele, realisht “OSHEE” krijon disbalanca negative dhe ka pasur detyrimin që këto disbalanca t’ia paguajë KESH. Praktikisht, ERE ka lënë në fuqi vendimin e  muajit maj i cili përcakton se impakti financiar që do të vijë nga korrigjimi i faturave do të reflektohet tek OSHEE, ndërsa me shumë gjasa kjo do të pasohet me më pak investime në rrjet që do të sillte përmirësimin e shërbimit ndaj qytetarëve.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.