Rëndohet fatura e energjisë – OSHEE rrit kërkesën për blerje, 409.000 mwh për dhjetorin

409.000 mwh është sasia e kërkuar nga Operatori i Shpërndarjes së Energjisë Elektrike për muajin dhjetor.

Thatësira e tejzgjatur, por edhe rritja e konsumit të energjisë për shkak të stinës së dimrit, duket se kanë ndikuar në rritjen e kërkesës për blerje, duke qenë se për muajin nëntor OSHEE bleu 270.000 mwh apo rreth 130.000 mwh më pak se sasia e kërkuar për dhjetorin.

Ndërkohë që, bazuar në rekomandimet e auditimit të Kontrollit të Lartë të Shtetit, OSHEE iu kërkon kompanive të interesuara të përfaqësohen nga vetëm një njësi e pavarur, e cila duhet të ketë emrin unik, përfaqësuesit unikë dhe  të gjitha kriteret e një kompanie të pavarur tregtare.

Për periudhën korrik-nëntor vlera e shpenzuara për blerjen e energjisë elektrike nga OSHEE arrin në 107.7 milion euro.

Ndërkohë që, nëse i referohemi çmimit mesatar për muajin nëntor prej 75.98 euro/mwh, atëherë për blerjen e fundit kompania e shpërndarjes pritet të shpenzojë rreth 31 milion euro, duke e çuar në 138.7 milion euro faturën për blerjen e energjisë elektrike.

Ndërkaq, shpenzimet për dhjetorin do të mbulohen edhe nga huaja prej 1 miliard lekë, e miratuar nga Këshilli i Ministrave në muajin tetor.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.