Rruga e Kombit, Gjiknuri: Taksa, e vetmja mënyrë për mirëmbajtje. Për frekuentuesit e rregullt do ketë abone
Taka është e vetmja mënyrë për t’u mirëmbajtur Rruga e Kombit. Ministri i Energjisë dhe Infrastrukturës Damian Gjiknuri deklaroi në Kuvend se rruga është ende e papërfunduar dhe përdoruesit e saj duhet të paguajnë, pasi vetë qeveria nuk ka buxhet të mjaftueshëm.
“Kjo rrugë që është shumë e shtrenjtë për shqiptaret por edhe e domosdoshme. Deri më tani ka kushtuar 1.3 miliard dollar dhe kërkon edhe nja 300 milion të tjera. Nuk është më e lartë se norma mesatare e Europës. Duhen investime të konsiderueshme, dhe përdoruesit e rrugës duhet të paguajnë. Dua të sqarojë në lidhje me spekulimet e deritanishme: Së pari, çfarë do të bëhet me këtë koncesion?
Kompania koncesionare do të investojë 262 milion euro, në operim, mirëmbajtje rutinë dhe rikonstruktim gjatë gjithë jetës së koncesionit. Vetëm në katër vitet e para do të investojë 45 milion dollar, që do të shkojnë për rehabilitim të autostradës, tuneleve, ndriçimit etj. Deri në 2030 janë parashikuar të investohen 54 milion euro. Por si mendoni, nga do të dalin këto? Ose shqiptarët do vazhdojnë të paguajnë dhe taksat të hiqen nga shëndetësia, shkollat, nga sektorë shumë jetikë dhe të hidhen paratë në rrugë. Pra, përdoruesit duhet të paguajnë që ta mirëmbajnë, nuk ka Shqipëria buxhet ta mbaj vetë. Nuk kanë mundësi vendet europiane dhe jo ne.
Së dyti, thuhet qe do devijohet trafiku për nga porti i Durrësit, për nga Selaniku, rruga Egnatia apo Maqedonia. Sipas llogarive, nëse do përdorim këto rrugët e tjera udhëtimi do të shkojë në 44 euro, koha do të jetë më e gjatë, pra ka më shumë shpenzime. Rrugët janë shumë të rëndësishme, dhe është një barrë për qeverinë. Por s’ka pse të paguaj qytetari që nuk ka makinë, por ata që përdorin rrugën”.
Ministri sqaroi edhe në lidhje me ankesën e përdoruesve të përditshëm të rrugës.
“Mund të ketë një ndikim fare të vogël, për mjetet frekuente do të ketë një abone më të reduktuar. Brenda 6 muaj do bëhet një marrëveshje me koncesionarin”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.