Sa para ka shpenzuar Shqipëria për luftën kundër COVID?!  Çfarë parashikohet për 2021

Projektbuxheti i vitit 2021 nuk ka lënë jashtë vëmendjes ndikimin që ka pasur dhe mund të ketë pandemia dhe tërmeti i nëntorit të kaluar në të ardhmen ekonomike të vendit. Ndaj, në relacionin e buxhetit analizohen edhe shpenzimet e kryera dhe pritshmëritë për pandeminë.

Sa i përket pandemisë, në relacion evidentohet se qeveria shqiptare i ka alokuar Ministrisë së e Shëndetësisë dhe Mbrojtjes Sociale një buxhet të dedikuar të menaxhimit të epidemisë në forcimin e sistemit shëndetësor në vlerën 2.4 miliardë lekë nga buxheti i shtetit për vitin 2020. Kësaj shume i janë shtuar edhe rreth 507 milion lekë ndihma kryesisht nga organizata ndërkombëtare në pajisje mjekësore, materiale mbrojtëse dhe medikamente.

Referuar relacionit, 1.2 miliard lekë janë përdorur për mjetet e mbrojtjes personale për stafin shëndetësor në të gjithë nivelet e sistemit shëndet publik, parësor dhe spitalor.

–160 milionë lekë janë përdorur për infrastrukturën spitalore pasi përveç dy spitaleve COVID të Shërbimit Infektiv në QSUT (COVID 1) dhe Spitalit Universitar Shefqet Ndroqi (COVID 2) janë bërë gati edhe dy spitale COVID; Spitali COVID 3 në godinën e ish kirurgjive në QSUT me një total prej 125 shtretërish, si dhe Spitali COVID 4 në godinën e ish Universitetit Kristal me kapacitet prej 108 shtretërish. Në relacion evidentohet se është investuar në forcimin e kapaciteve të terapisë intensive dhe subintensive, duke dedikuar 500 shtretër, 80% e tyre me linja oksigjeni dhe ku gjysma e tyre janë kapacitete të reja në sistem (COVID 3 dhe 4)

764.9 milionë lekë janë përdorur për të pajisur me aparatura të reja spitalet Covid dhe njësitë e terapive intensive në spitalet rajonale përkatësisht 100 shtretër të rinj reanimacioni, 265 monitorë multiparametrik, 134 respiratorë invasive dhe joinvazive (është rritur me 67% kapaciteti i aparaturave jete-shpëtuese respiratore në terapitë intensive dhe sub intensive), si dhe janë alokuar fondet për blerjen e pajisjeve të rënda biomjekësore për shërbimin e imazherisë dhe diagnostikës.

Për personelin shëndetësor në vijën e parë të luftës është përcaktuar shpërblimi financiar 1,000 euro mbi pagën mujore për personelin shëndetësore dhe 500 euro mbi pagën për stafin mbështetës.

“Deri sot 522 mjekë, 1,130 infermierë dhe 134 epidemiologë përfituan bonusin 1,000 euro mbi pagën mujore/ shpërblimin sipas punës së kryer me pacientët me COVID-19. 739 staf mbështetës kanë përfituar bonusin 500 euro/shpërblimin sipas punës së kryer me pacientët me COVID19 mbi pagën mujore, si dhe janë punësuar 150 personel shëndetësor për të siguruar rritjen e kapaciteteve të burimeve njerëzore në spitalet Covid” shkruhet në relacionin e projektbuxhetit.

Më tej, në projektbuxhet evidentohet se “është thelbësore të përgatitemi për menaxhimin e situatës së krijuar në vijimësi, nëpërmjet alokimit të fondeve të dedikuara buxhetore edhe për vitin 2021 për përmbushjen e objektivit tonë strategjik për të garantuar mbulim shëndetësor për të gjithë qytetarët, mbrojtje të personelit mjekësor dhe forcimin e hetimit epidemilogjik dhe diagnostikimit në kohë të pacientëve si një masë për parandalimin e përhapjes së COVID – 19”.

Prioritete për vitin 2021:

-Marrjen e masave efektive dhe ruajtjen e vazhdimësisë së shërbimeve spitalore, ofrimin e shërbimeve bazuar në protokollet mjekësore COVID-19, adaptimin e shpejtë dhe përshtatjen e shërbimeve ndaj kërkesave të reja që mund të paraqiten ,si pasojë e pandemisë, përdorimin me eficiencë të burimeve njerëzore, si dhe krijimin e ambientit të sigurt spitalor për profesionistët e shëndetit.

-Ripozicionimin e shërbimeve spitalore të aksesueshme fizikisht për popullatën, që ka nevojë për përdorimin e tyre dhe vazhdimësinë e ofrimit të shërbimit spitalor të urgjencës në kushtet e ashpërsimit të pandemisë.

-Vlerësimin dhe përditësimin e protokolleve të hartuara për referimin dhe transportin nga urgjenca paramjekësore në strukturat spital dhe zgjerimi i skuadrave të lëvizshme dhe të dedikuara që ofrojnë shërbime në banesë dhe në bashkëpunim me mjekët e familjes;

-Hartimi i protokolleve për trajtim në banesë nga QKUM (skuadrat e terrenit) në bashkëpunim me mjekët e familjes, për pacientët që nuk kanë nevojë për hospitalizim dhe shtim të mëtejshëm të kapaciteteve të burimeve njerëzore duke rekrutuar dhe trajnuar staf shtesë;

-Shtim të kapaciteteve, përfshirë flotën e autoambulancave, kapacitetet në sistemet e informacionit, etj.

-Fuqizimin e rolit të Mjekut të Përgjithshëm dhe të Familjes, Mjekut Specialist të Qendrave Shëndetësore dhe Infermierit në Kujdesin Parësor në diagnostikim dhe ndjekje të pacientëve me COVID-19 dhe pacientëve të tjerë kronikë me probleme për lëvizje/dalje nga banesat e tyre, nëpërmjet platformave digjitale si skype, whatsapp, etj., ose nëpërmjet vizitave në banesë kur mjeku e gjykon të arsyeshme, e veçanërisht për personat me risk të lartë.

-Ofrimin e kujdesit shëndetësor në Shtëpitë e të Moshuarve (azile) në përputhje me nevojat e tyre përmes bashkëpunimit me mjekët e përgjithshëm dhe mjekët e familjes dhe në rastet kur është e nevojshme edhe me mjekët specialistë të poliklinikave (QSHS) dhe infermierëve.

-Fuqizimin e shërbimit infermieristik territorial për të fuqizuar asistencën (kujdesin) në banesë për të sëmurët kronikë, pacientët me paaftësi fizike (tetraplegjikë, paraplegjikë, të verbërit, invalidët e përhershëm), pacientët me probleme të shëndetit mendor dhe ata që për arsye të pamundësisë së lëvizjes janë të izoluar në shtëpi.

-Ofrimin e konsultave on-line për pacientët kronikë në gjendje të stabilizuar me qëllim kufizimin e grumbullimit të tyre ambjentet e strukturave shëndetësore.

-Rritjen e kapaciteteve laboratorike dhe ofrimin e panelit të analizave të nevojshme si dhe testimin për RT – PCR SARS COV 2 edhe në sistemin spitalor rajonal

-Në kuadër të rritjes së kapaciteteve për përballimin e situatave të krijuara nga COVID-19 dhe uljen e përhapjes së infeksionit do të garantohet furnizimi i pandërprerë i stafit mjekësor me të gjitha mjetet mbrojtëse personale të nevojshme, duke përfshirë:Maske Respiratore; Syze mbrojtëse; Doreza; Përparëse me një përdorim dhe të padepërtueshme; Kapuçët kirurgjikalë të kokës; Veshjet mbrojtëse Tyvek, etj.

-Me qëllim parandalimin e shpërhapjes së infeksionit në institucionet spitalore do t’i kushtohet gjithashtu rëndësi e veçantë: Manaxhimit të mbetjeve infektive; Zbatimit të rreptë të protokolleve mbrojtëse nga stafi mjekësor; Kontrollit të infeksionit mjedisor nëpërmjet dizinfektimit të saktë dhe të shpeshtë të ambjenteve të kujdesit shëndetësor.

Kostoja totale e këtyre prioriteteve që do të financohet nga buxheti është rreth 6 miliardë lekë dhe do të garantojë një menaxhim sa më të mirë dhe efikas të pandemisë COVID 19. (Këtu nuk përfshihet kostoja e rritjes së pagave me 40% për stafin mjekësor).

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.