Sa para marrin bashkitë në 2020? – Formula e re e ndarjes së transfertës së pakushtëzuar

Transferta e pakushtëzuar që u jepet bashkive në vitin 2020, e cila ka për qëllim t’u sigurojë atyre diferencën mes kostos së ushtrimit të funksioneve  (nevojat për shpenzime) dhe të ardhurave që ato krijojnë në mënyrë të pavarur, në total arrin vlerën e 25 miliardë lekëve. Rreth 18 miliardë lekë është pjesa e përgjithshme e Transfertës së  Pakushtëzuar (TP), që korrespondon me 1 për qind të PBB dhe 7.6 miliardë lekë është pjesa sektoriale.Gjithsej transferta e pakushtëzuar që shpërndahet nëpërmjet formulës është 20 miliardë lekë, pas zbritjes së fondeve për konviktet, shërbimet sociale, për rrugët rurale dhe për mbështetjen e reformës në arsimin parashkollor, të cilat me qëllim rritjen e transparencës janë nxjerrë jashtë totalit të transfertës që ndahet me formulë. Kriteret e shpërndarjes së fondeve në formulë kërkojnë të identifikojnë nevojat reale të shpenzimeve të njësive të ndryshme të vetëqeverisjes vendore mbi bazën e popullsisë, dendësisë së popullsisë dhe numrit të fëmijëve në  kopshte dhe nxënësve në shkollat publike 9-vjeçare dhe të mesme në  territorin e një bashkie. Në formulë 63.8 % e transfertës për bashkitë alokohet mbi bazën e popullsisë relative. Në vijim të  rregullimit të numrit të popullsisë së Censusit duke i shtuar atij edhe 30% të diferencës midis të dhënave  të Gjendjes Civile dhe të dhënave të Censusit, çdo njësi e vetë qeverisjes vendore merr një transfertë të  pakushtëzuar prej 3,845 lekë, për çdo banor rezident në njësinë e vetë qeverisjes vendore.  Në formulë 12 % e totalit të fondit për bashkitë,ndahet mbi bazën e dendësisë së popullsisë. Kriteri  i  tretë  mbi  të  cilin  ndahet  transferta  e  pakushtëzuar  për bashkitë është  numri  i fëmijëve  në arsimin parashkollor i kombinuar me numrin e personelit mësimor në arsimin parashkollor, dhe numri i nxënësve  në  shkollat  publike  nëntë-vjeçare  dhe  të  mesme. Ndërkohë,  pjesa  prej  5%  e  totalit  të  transfertës së  pakushtëzuar  të  përgjithshme  për  bashkitë do  të ndahet mbi  numrin  faktik  të  nxënësve  në  shkollat  publike në  çdo  bashki,  kundrejt totalit kombëtar të nxënësve. Bashkitë do të marrin një fond prej 1,920 lekë për çdo nxënës  në territorin e tyre. Dhe kriteri i fundit është mbi bazën e të ardhurave që marrin nga tatimi mbi fitimi e bizneseve dhe taksën e automjeteve të përdorura. Njësitë e vetëqeverisjes vendore që kanë të ardhura për frymë nën 80% të mesatares kombëtare  prej 534 lekë/frymë, do të kompensohen me 100% të diferencës ndërmjet të ardhurave të tyre për frymë dhe mesatares kombëtare.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.