Së shpejti një Ministri Diaspore në Kabinetin Qeveritar, Rama: E domosdoshme! Paralajmëron rastet kur ambasadorët do largohen nga detyra!

Së shpejti pjesë e Këshillit të Ministrave do të jetë edhe një Ministri për shqiptarët në diasporë. Lajmi është dhënë nga Kryeministri Rama, gjatë ditës së sotme në një takim me Ambasadorët në Ministrinë e Punëve të Jashtme.

“Dua t’iu informoj se qeveria jonë do të ketë një ministër shteti për shqiptarët jashtë atdheut. Vota e shqiptarëve është një detyrim i pa anashkalueshëm më nga një qeveri shqiptare. Marrëdhëniet ndërshqiptare në rajon kërkojnë një vëmendje të fokusuar dhe intensive nga niveli më i lartë i qeverisë. MPJ ka nevoje për një krah shumë të fortë, për një forcë të re me fuqi të plotë politike që buron drejtpërdrejtë nga niveli i Kryeministrit. Bota jonë e jashtme e dijeve ka marrë distanca të reja. Fuqia e diasporës përbën një potencial të padiskutueshëm. Vendosja e një figure, e një ministri shteti pranë, kryeministrit është mjaft e domosdoshme.”

Kryeministri gjatë fjalës së tij në takimin me ambasadorët pohoi se bashkëpunimi me diasporën lë shumë për të dëshiruar, ndaj u shpreh se kërkohen masa për të ecur më tej.

“Pjesë e rëndësishme është edhe bashkëpunimi me diasporën, që lë shume për të dëshiruar me organizatat e diasporës, me forcat e reja të krijuara në diasporë. Duhet të ecim më tutje jo thjeshtë për të konkretizuar angazhimet e Samitit të parë të Diasporës, por edhe për t’i bërë gjërat sipas kohë, forcave të reja dhe shërbimit tonë të jashtëm në funksion të Shqipërisë së Re”, pohoi Rama.

Por në fjalën e tij kryeministri njoftoi edhe rastet kur do të jepet vlerësimi, kur do të promovohet apo edhe do të largohet nga detyra një Ambasador.

“Duhet ta keni të qarte që sot, sepse kjo mund t’iu ndihmojë në përgatitje, në bazën e pasqyrave tremujore do të vendoset vlerësimi, promovimi, qoftë edhe largimi nga detyra e ambasadorëve. Bilanci vjetor i kësaj pune do të mbështesë apo do të përcaktojë largimin e ministrit tuaj nga detyra”

Rama gjithashtu shtoi se nëse një Ambasadë vazhdon dhe “gjallërohet” si Zyrë Dezhurni dhe jo si katalizator kontaktesh, nuk ka arsye të ekzistoje, dhe sipas tij nuk do ekzistojë më.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.