Sejko: Viti 2021 pritet të shënojë një kthesë pozitive në gjallërimin e ekonomisë së vendit
Gjatë fjalës së tij në Kuvend, Guvernatori Gent Sejko u shpreh se pandemia COVID-19 e vuri Bankën e Shqipërisë – ashtu si dhe gjithë ekonominë, shoqërinë dhe institucionet shqiptare – përballë sfidave të paparashikuara dhe të jashtëzakonshme por e ndërgjegjshme për madhësinë dhe kompleksitetin e problemit, në koordinim dhe me politikën fiskale, Banka e Shqipërisë ndërhyri në mënyrë të shpejtë dhe të plotë.
Sejko theksoi se objektivat e ndërhyrjes së Bankës së Shqipërisë ishin pikërisht: lehtësimi i impaktit afatshkurtër të krizës në ekonomi; reduktimi i pasojave të mundshme negative në potencialin prodhues të vendit; si dhe ruajtja e stabilitetit monetar dhe financiar të vendit.
Sipas informacionit të publikuar guvernatori bën me dije se pavarësisht sfidave, veprimtaria e sektorit bankar u shfaq e qëndrueshme ndërsa gjatë vitit 2020, aktivet e këtij sektori u rritën me rreth 7%, rezultati financiar mbeti në territor pozitiv, kapitalizimi i tij mbetet i kënaqshëm dhe raporti i kredive me probleme zbriti në 8.1% në fund të vitit.
Sejko theksoi në fjalën e tij se Banka e Shqipërisë ka ruajtur një vëmendje konstante dhe ndaj fushave të tjera të aktivitetit të saj, të cilat kanë një kontribut direkt në zhvillimin e tregut financiar dhe në jetën ekonomike të vendit.
“Gjithashtu, sistemet e kontrollit të brendshëm të ngritura kanë vijuar të kontribuojnë në mirëadministrimin e proceseve normale të punës dhe vijueshmërinë e të gjitha funksioneve të bankës. Viti 2021 pritet të shënojë një kthesë pozitive në drejtim të gjallërimit të ekonomisë së vendit”, u shpreh guvernatori.
Sipas tij hapja e ekonomive partnere, vaksinimi i popullsisë, dhe stimuli monetar e fiskal në vend do të mbështesin zgjerimin e aktivitetit ekonomik gjatë vitit 2021 dhe atij 2022 por pasiguritë mbi këto pritje mbeten të pranishme dhe probabiliteti i goditjeve të tjera negative në të ardhmen nuk është i neglizhueshëm.
Guvernatori Sejko bëri me dije se rimëkëmbja e plotë e ekonomisë dhe kthimi i qëndrueshëm i inflacionit në objektiv duhet të vijojnë të mbështeten nga stimuj makroekonomikë në afatin e shkurtër ndërsa në afatin e mesëm dhe të gjatë, politikat ekonomike duhet të zhvendosen drejt një balance më të qëndrueshme midis nevojës për të ofruar stimul dhe nevojës për të ruajtur stabilitetin monetar dhe financiar.
Në fund të fjalës së tij Sejko u shpreh se përfundimi i krizës duhet të shoqërohet me rikthimin e plotë të vëmendjes në nevojën e përshpejtimit të axhendës së reformave strukturore pasi ato janë instrumenti i vetëm për përshpejtimin e qëndrueshëm të ritmit të rritjes ekonomike dhe për shndërrimin e fryteve të saj në një përmirësim sa më të gjerë të mirëqenies sociale.
“Ato duhet të synojnë rritjen e konkurrueshmërisë, përmirësimin e mëtejshëm të klimës së investimeve dhe të biznesit, si dhe forcimin afatgjatë të qëndrueshmërisë së financave publike”, u shpreh ai.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.