Shkelja e lejeve të ndërtimit, gjobat e reja – Penalitet 2% të çmimit minimal fiskal për çdo m² sipërfaqe banimi, 5% për bizneset
Këshilli i Ministrave ka miratuar procedurat përmes të cilave do të legalizojnë objektet por penalitetet me të cilët do të përballen ndërtuesit të cilët kanë shkelur lejet e ndërtimit, objektet e të cilëve nuk janë regjistruar në hipotekë. Sipas vendimit të publikuar tashmë në Fletoren Zyrtare, do të aplikohen penalitete të ndryshme në funksion të destinacionit të objektit.
Deri në miratimin e vendimit të Këshillit të Ministrave në zbatim të pikës 3, të nenit 67, të ligjit nr. 20/2020, “Për përfundimin e proceseve kalimtare të pronësisë në Republikën e Shqipërisë”, llogaritja e penalitetit për shkeljen e lejes së ndërtimit kryhet në këtë mënyrë: a) 2 për qind të çmimit minimal fiskal, për çdo m² sipërfaqe banimi;
- b) 5 për qind të çmimit minimal fiskal, për çdo m² sipërfaqe që shfrytëzohet për veprimtari social-ekonomike; c) 10 për qind të çmimit minimal fiskal, për çdo m² sipërfaqe që është bërë ndryshim destinacioni.
Për identifikimin e çmimit minimal fiskal, drejtoritë vendore të ASHK-së mbështeten në përcaktimet e vendimit nr. 860, datë 10.12.2014, të Këshillit të Ministrave, “Për përcaktimin e mënyrës së mbledhjes dhe administrimit të të ardhurave për ndërtimet pa leje dhe vlerave të zbatueshme për legalizim”, thekson vendimi i Qeverisë.
Këto dispozita zbatohen edhe kur ka ndryshime të gjendjes juridike të pronësisë të sheshit të ndërtimit, në raport me dokumentacionin e lejes përkatëse të ndërtimit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.