Shkëmbimet tregtare/Shqipëria bleu me shumë nga SHBA por shiti më pak në 6 mujorin e 2019!

Shifrat e publikuara nga INSTAT për tregtinë e jashtme kanë sjellë lajme jo të mira për shkëmbimet tregtare të Shqipërisë në 6 muajt e parë të vitit. Eksportet kanë njohur rënie të ndjeshme. Në listën e vendeve me të cilat Shqipëria ka njohur një ulje të eksporteve janë edhe Shtetet e Bashkuara të Amerikës.

Sipas INSTAT, në tregtinë e jashtme me Shtetet e Bashkuara të Amerikës, Shqipëria ka ulur ndjeshëm eksportet në gjysmën e parë të vitit 2019, krahasuar me të njëjtën periudhë të vitit 2018.

Por nga ana tjetër, vërehet se në Janar – Qershor 2019, Shqipëria ka importuar nga Shtetet e Bashkuara të Amerikës më shumë nga çka bërë në periudhën Janar – Qershor të vitit paraardhës.

Instat tregon se në pjesën e parë të këtij viti, mallrat dhe produktet që kanë kaluar nga Shqipëria drejt SHBA- së kanë kapur vlerën e 1.92 miliardë lekëve, kur në të njëjtën periudhë të një viti më parë, kjo vlerë ka qenë 2.4 miliardë lekë. Përafërsisht, eksportet nga Shtetet e Bashkuara kanë rënë me 500 milionë lekë.

Por, për importet nga Shtetet e Bashkuara vlen e kundërta. Referuar shifrave të Instat, në Janar – Qershor 2019, Shqipëria ka importuar 5.2 miliardë lekë mallra dhe produkte nga SHBA, kur për të njëjtën periudhë të 2018- ës, vlera e mallrave dhe produkteve të importuara nga po ky shtet, është shënuar 4.5 miliardë lekë, rreth 740 milionë lekë më shumë.

Shkëmbimet e qershorit  

Përsa i përket Qershorit, muajit që ‘vulos’ të dhënat e këtyre 6 muajve, vihet re një rënie drastike me afro 70 % të eksporteve drejt Shteteve të Bashkuara. Instat tregon se në Qershor 2018, Shqipëria ka eksportuar 462 milionë lekë mallra dhe produkte drejt SHBA-së, kurse qershori i këtij viti, ka ndjerë një rënie me 304 milionë lekë. Në qershor, eksportet drejt SHBA-së arritën të kapnin një vlerë prej vetëm 158 milionë lekësh.

Kurse për sa i përket importeve, edhe në qershor 2019 është ndjerë rritja e tyre. Nga 642 milionë lekë mallra dhe produkte të importuara në qershorin e vitit paraardhës, në këtë vit, Shqipëria importoi  724 milionë lekë mallra dhe produkte nga Shtetet e Bashkuara.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.