Shkolla e ‘Hoteleri-Turizmit’ do t’i nënshtrohet rikonstruksionit – Ja ndërhyrjet që do të kryhen
Shkolla e ‘Hoteleri-Turizëm’ në Tiranë do t’i nënshtrohet së shpejti rikonstruksionit. Ministria e Financave dhe Ekonomisë ka hapur procedurat e tenderimit për fazën e dytë të punimeve, për të cilat është vënë në dispozicion një fond limit prej 82 milionë lekësh.
Aktualisht janë rreth 1000 nxënës që studiojnë në dy drejtime mësimore, Hoteleri-Turizëm dhe Teknologji Ushqimore.
Sipas detajeve të projektit, në këtë fazë është parashikuar të bëhet rehabilitimi i hapësirave ekzistuese të shkollës. Ndërhyrja bazohet kryesisht në ristrukturimin e krahut verior të godinës ekzistuese, e cila përmbush programin hapësinor sa i përket nevojës për klasa të reja.
Ndërsa, ndërhyrja e dytë parashikon rikonstruksionin e palestrës, kryesisht për të eliminuar lagështinë e pranishme në ambientet e saj. Po ashtu, punime do të kryhen edhe në oborrin e shkollës, i cili do të rrethohet m e mur beton si dhe do të vendosen po ashtu edhe stola për qëndrimin në orët e pushimit.
Po ashtu, punimet parashikojnë edhe gjelbërimin e oborrit me sipërfaqe bari si dhe pemë përreth tij. Projekti po ashtu parashikon edhe një fushë sportive në oborrin e shkollës, e cila do të shërbejë për zhvillimin e programit mësimor, si dhe një zonë parkimi për makina dhe biçikleta.
Operatorët ekonomikë do të kenë mundësi të dorëzojnë ofertat e tyre deri në datën 22 gusht 2018. Ndërsa sa i takon kohëzgjatjes së kontratës, ajo përfshin një periudhë kohore prej 5 muaj.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.