Shoqata e Bankave, “OK” fiskalizimit – “Nismë pozitive, detyrat do të jenë të natyrës teknike”
Shoqata Shqiptare e Bankave vlerëson pozitivisht nismën ligjore të fiskalizimit. Sekretari i përgjithshëm, Spiro Brumbulli, thotë se ligji i ri do të ulë evazionin dhe mashtrimin tatimor, do të shmangë faturat fiktive dhe në tërësi do të ndihmojë në formalizimin e ekonomisë. Rritja e besueshmërisë së pasqyrave financiare do të ketë një ndikim pozitiv në marrëdhëniet me sistemin bankar, përfshi aksesin në kredi.
Bankat do jenë një hallkë e rëndësishme e sistemit të ri dhe do të raportojnë në kohë reale të gjitha shlyerjet e faturave të bizneseve që bëhen përmes llogarive të tyre. Zoti Brumbulli shprehet se detyrat për bankat janë kryesisht të natyrës teknike dhe do të gjenden zgjidhjet e përshtatshme deri në vitin 2021, kur do të fillojë lëshimi i faturave elektronike në marrëdhëniet mes bizneseve.
Nga ana tjetër, ulja e limiteve ditore për paranë cash në arkat e biznesit mund të sjellë flukse më të larta në sportelet e bankave. Kjo mund të kërkojë zgjerimin e kapaciteteve dhe zgjatjen e orareve, megjithatë, Shoqata e Bankave vlerëson se këto janë çështje operacionale që do të adresohen për t’iu përgjigjur nevojave të publikut.
Ersuin Shehu/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.