Shqipëri-Maqedoni, thellohet bashkëpunimi në Dogana – Së shpejti, grup pune të përbashkët për këto 2 çështje
Së shpejti do të ngrihet një grup pune i përbashkët për monitorimin e zbatimit të marrëveshjeve që parashikojnë ndihmë të ndërsjellë administrative në çështjet doganore si dhe për rritjen e bashkëpunimit ndërkufitar midis Administratës Doganore të Shqipërisë dhe Maqedonisë.
Këto ishin edhe dy nga çështjet kryesore për të cilën ranë dakord krerët e Doganave të dy vendeve, Belinda Ikonomi dhe Gjoko Tanasoski gjatë një takimi bilaterel të zhvilluar në Korçë.
Në kuadër të rritjes së bashkëpunimit ndërkufitar, palët vunë theksin konkretisht te mundësia e kalimit të kufirit të përbashkët Qafë Thanë-Kafasan.
Rritja e marrëdhënieve tregtare, shkëmbimi i informacionit në kohë reale si dhe lehtësimi i procedurave për bizneset reciproke ishin po ashtu në fokus të këtij takimi.
Ikonomi vlerësoi vazhdimin në mënyrë të rregullt të shkëmbimit paraprak të ët dhënave midis dy Administratave Doganore. Përmes këtij procesi bëhet i mundur shkëmbimi elektronik i të dhënave në kohë reale, duke identifikuar rastet me risk më të lartë si dhe shkeljet doganore.
Ndërkohë, Doganat e dy vendeve bashkëpunojnë jo vetëm në kuadër të anëtarësimit dhe aktiviteteve të përbashkëta me Organizatën Botërore të Doganave, por edhe në projekte e aktivitete rajonale të organizuara nga SELEC.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.