Shqipëri-Serbi, bashkëpunim për turizmin! Nga statistikat te qendra kombëtare e informacionit, detajet e marrëveshjes
Shqipëria dhe Serbia kanë nënshkruar marrëveshjen e bashkëpunimit në fushën e turizmit. Këshilli i Ministrave i Republikës së Shqipërisë dhe Qeveria e Republikës së Serbisë, kanë nisur bashkëpunimin në fushën e turizmit duke vlerësuar rolin e dialogut dhe konsultimeve në nivele të ndryshme ndërmjet palëve për çështjet me interes të përbashkët.
Palët, në përputhje me legjislacionin e brendshëm të dy vendeve do të mbajnë bashkëpunim reciprok dhe do të inkurajojnë shkëmbimin e materialeve promovuese në fushën e bashkëpunimit në turizëm, organizimin e vizitave studimore për përfaqësues të mediave dhe profesionistë turistik.
Prioritet do të ketë shkëmbimi i ndërsjellët i statistikave të turizmit dhe të informacionit, programet arsimore, aftësimi profesional i personelit, si dhe studime dhe projekte kërkimore në fushën e turizmit.
Gjithashtu do të krijohen qendra kombëtare të informacionit turistik në territorin e secilës palë për të informuar mbi të gjithë dokumentet ndërkombëtare në fushën e turizmit që mund të jenë me interes për bashkëpunimin mes tyre.
Kjo marrëveshje do të jetë e vlefshme për një periudhë prej 5 vitesh. Vlefshmëria e saj do të shtyhet automatikisht për 5 vitet e ardhshme me miratim të dy palëve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.