Shqipëria bie në lirinë ekonomike/Raporti i “Heritage” për 2020, humbet 5 pozicione, por rrit pikëzimin

Shqipëria ka humbur plot 5 pozicione në indeksin e lirisë ekonomike 2020, të sapopublikuar nga fondacioni Heritage. Ky fondacion që prej vitit 1995 publikon indeksin më prestigjioz në nivel global sa i përket lirisë ekonomike.

Kështu, këtë vit, vendi ynë renditet i 57-ti në nivel global, ndër 180 shtete,) nga vendi i 52-të i një viti më parë. Pavarësisht se ka humbur 5 pozicione, vendi ynë është përmirësuar në lirinë ekonomike, pasi pikëzimi i përgjithshëm është rritur. Sipas raportit, kjo vjen falë përmirësimit të shëndetit fiskal dhe se rënia në renditje është rrjedhojë e përmirësimit më të fortë të të tjerëve.

Pavarësisht rënies, renditja e përgjithshme mbetet relativisht e favorshme, pasi vende si Franca, Italia, Greqia, Spanja apo Serbia, Bosnje Hercegovina, Kroacia a Hungaria janë më dobët se ne në renditje. Sa i përket nën-indikatorëve janë përkeqësuar ata të cilët i referohen lirisë së biznesit, asaj të punës apo asaj monetare, si dhe barra e taksave.

Në profilin e Shqipërisë, mes reshtave thuhet se, për të rritur gjasat për anëtarësim në Bashkimin Europian, duhet të regjistrojë një rritje të ndjeshme në indikatorët e të drejtës së pronës, efektivitetit të gjyqësorit si dhe integritetit të qeverisë.

Në nivel global, në vend të parë qëndron Singapori, i ndjekur nga Hong Kongu dhe Zelanda e re.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.