Shqipëria “kundër” NATO-s? – Projektohet rënie e shpenzimeve për mbrojtjen me 6,3% në 2017-2021
Me vetëm 100 milionë dollarë shpenzime për mbrojtjen, çka përkthehet në 1.19% të Prodhimit të Brendshëm Bruto, Shqipëria renditet ndër vendet e fundit në botë sa i përket mbrojtjes si prioritet i qeverisë.
Këtë e thotë PriceWaterhouseCoopers në raportin global të perspektivës së mbrojtjes 2017. Ndër 71 shtete të marra në analizë, Shqipëria renditet vetëm e 51-ta mes tyre në këtë drejtim.
Këtë gjë e ilustron mjaft mirë edhe ky grafik, që ndër të tjera konfirmon edhe një shifër të debatuar prej kohësh, sidomos brenda Natos, pra limitin e shpenzimeve për mbrojtjen, në 2% të Prodhimit të Brendshëm Bruto të një vendi.
Presidenti amerikan, Donald Trump ka qenë më i ashpri me vendet anëtare në këtë drejtim. Shqipëria, si anëtare e aleancës duhet ta respektojë një angazhim të tillë, por ashtu si shumë vende të tjera aleate dështon ta bëjë diçka të tillë.
Por, ajo që është më paradoksale është fakti se shpenzimet për mbrojtjen projektohet të bien, në raport me PBB. Raporti thotë se, ndërkohë që gjatë periudhës 2012-2016, shpenzimet për mbrojtjen kanë qenë në rënie, me 4.4%, përgjatë periudhës 2017-2021 rënia do të jetë edhe më e thellë, në 6.3%.
Kështu, rezulton se, Shqipëria është jo vetëm një ndër të paktat vende të botës ku projektohet rënie e shpenzimeve për mbrojtjen, por edhe vendi i parë në Nato me një rënie të këtyre përmasave.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.