Si arrin ta mbajë Banka e Shqipërisë inflacionin pranë objektivit?

Shumë njerëz nuk e dinë në të vërtetë se çfarë është inflacioni, si ndodhin ulje-ngritjet e çmimeve apo si mbahen në kontroll ato. Për të gjitha këto kujdeset Banka e Shqipërisë e cila luan rolin e një rregullatori.

Në mënyrë që të mbajë inflacionin pranë objektivit, Banka e Shqipërisë siguron që kërkesa e përgjithshme për mallra dhe shërbime në ekonomi të rritet në mënyrë të qëndrueshme, as shumë shpejt dhe as shumë ngadalë, në mënyrë që oferta ta përballojë atë. Si arrihet kjo gjë?

Kjo arrihet nëpërmjet ndryshimit të normës bazë të interesit që ajo aplikon për bankat tregtare, duke ndikuar kështu normat e interesit që ato vendosin për depozitat dhe kreditë.

Në këtë mënyrë ndikohen vendimet për të kursyer apo konsumuar dhe investuar në ekonomi, pra kërkesa e përgjithshme për mallra dhe shërbime.

Nëse Banka e Shqipërisë mendon se kërkesa po rritet shumë shpejt dhe kjo do të shkaktojë rritjen e inflacionit mbi vlerën 3 % të objektivit për të, atëherë kjo rrit normën bazë ët interesit.

Kur normat e interesit rriten, njerëzit janë të prirur të kursejnë më shumë nga të ardhurat e tyre, pra të konsumojnë më pak.

Rritja e normës së interesit do të thotë gjithashtu këste më të larta për kreditë e marra. Kështu, njerëzit shpenzojnë më pak, pra blejnë më pak mallra dhe shërbime.  Kërkesa e përgjithshme ngadalësohet dhe inflacioni bie.

Ky është një shembull i një politike monetare shtrënguese të cilën Banka Qendrore e ndjek kur kërkesa rritet më shpejt se sa duhet dhe inflacioni mund të rritet mbi objektiv.

Nga ana tjetër, Banka e Shqipërisë zbaton një politikë monetare lehtësuese kur mendon se kërkesa në ekonomi është duke u rritur shumë ngadalë dhe inflacioni pritet të bjerë nën objektivin e Bankës.

Në këtë rast, Banka e Shqipërisë ul normën bazë të interesit. Këstet e kredive të marra bëhen më të ulëta dhe kreditë e reja bëhen më bëhen më të lira.

Ndërkohë normat më të ulëta të interesit i bëjnë kursimet më pak tërheqëse dhe kështu njerëzit kursejnë më pak dhe shpenzojnë më shumë.

Kërkesa e përgjithshme rritet dhe kështu dhe inflacioni rritet, duke iu afruar objektivit.

Burimi: Banka e Shqipërisë

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.