Situata nga moti, aktivizohen planet e emergjencës – Spitalet në gatishmëri, masa për sigurimin e barnave dhe ofrimin e shërbimeve
Aktivizohen planet e emergjencës. Spitalet dhe shërbimi i Urgjencës Kombëtare ndodhet në gjendje gatishmërie, ndërkohë që janë shtuar masat e emergjencës dhe të kontrollit për monitorimin e ujit të pijshëm dhe për ruajtën e shëndetit publik.
Ministrja e Shëndetësisë dhe Mbrojtjes Sociale Ogerta Manastirliu ka urdhëruar aktivizimin e planit të gatishmërisë shëndetësore, si pasojë e përmbytjeve të shkaktuara nga moti i keq që ka përfshirë të gjithë vendin.
“Të gjitha strukturat shëndetësore kanë aktivizuar tashmë planet e emergjencës, duke siguruar shtim të kapaciteteve në rast nevojë për të përballuar një rritje të sëmundshmërisë apo ngjarjeve të tjera që kanë lidhje me situatën e krijuar; sigurimin e barnave dhe materialeve mjekësore për çdo fluks potencial emergjence; sigurimin e energjisë, ujit dhe ngrohjes së spitaleve. Njësia e helikopterëve është në gatishmëri të plotë për çdo ndërhyrje të nevojshme”, thuhet në njoftimin e Ministrisë së Shëndetësisë.
Ministrja Manastirliu ka urdhëruar gjithashtu strukturat e shëndetit publik të marrin masa për ofrimin e shërbimit shëndetësor për popullatën që evakuohet/zhvendoset si pasojë e situatës së krijuar.
“Nga ana tjetër, drejtoritë e shëndetit publik po monitorojnë situatën në kuadër të garantimit të masave për shëndetin publik. Situata në spitale është nën kontroll dhe të gjitha strukturat e Ministrisë së Shëndetësisë dhe Mbrojtjes Sociale, janë në gatishmëri për të përballuar çdo emergjencë të mundshme, pasojë e motit të keq që ka përfshirë të gjithë vendin”, thuhet në njoftimin e Ministrisë së Shëndetësisë.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.