SME-të një listë kërkesash për qeverinë! Shoqata: Paketë ekonomike që të mos falimentojmë

Bizneset e vogla dhe të mesme në vend i kanë dërguar një letër zyrtare qeverisë ku i kërkohet që të marrë masa, pasi në këto kushte kur sipërmarrjet janë përballur me mbyllje për shkak të vendimeve të qeverisë për frenimin e përhapjes se coronavrius, mund të falimentojnë.

Në letrën drejtuar qeverisë, SME-të kërkojne shtyjen e pagesave, gjobave dhe detyrimeve fiskale të biznesit ndaj shtetit, rimbursimin e plotë të pagave të punonjësve dhe sigurimeve, shtyrjen e pagesave të energjisë elektrike, ujit  dhe taksave vendore,  përjashtimin nga taksa e pronës, aplikimin e një lloj skeme rimbursimi për të kompensuar humbjet e bizneseve gjatë kësaj periudhe, si dhe kompensim të plotë të pagesave të qirave dhe tatimit në burim të qiradhënësit për të gjitha subjektet që të cilat janë qiramarrës.

Në letër thuhet se masat për shëndetin publik kufizojnë dhe dëmtojnë aktivitetin ekonomik, ndërkohë që  bizneset vazhdojnë dhe paguajnë shpenzimet fikse megjithëse kanë pezulluar aktivitetin. “Në treg ka ndryshime të mëdha të rregullit ekonomik kërkesë-ofertë. Bizneset do të përballen me krizë parash, rrjedhimisht punëtorët do të ngelen pa punë. Në këto kushte, biznesi është i detyruar ose të marrë borxh para në banka dhe rrugë informale ose të falimentojë,” shkruhet në letër. Shoqata e Biznesit të Vogël dhe të Mesëm kërkon që të ndiqet shembulli i shteteve të tjera europiane, të cilat po e mbështesin sipërmarrjen gjatë kësaj përiudhe vështirësie.

Elisabeta Dosku/SCAN

Letra e plotë

Tiranë më 15.03.2020

Kërkesë:  Për disa masa lehtësuese fiskale ndaj biznesit

Drejtuar:  Qeverisë të Republikës të Shqipërisë

Për dijeni: Ministrisë të Financave dhe Ekonomisë

Në situatat e pandemisë për shkak të covid-19, në të cilën po kalon vendi, Shoqata e Biznesit të Vogël dhe të Mesëm  të Shqipërisë, përshëndet masat e ndërmarra nga Qeveria, për mbrojtjen e jetës të qytetarëve. Mbyllja e aktiviteteve ekonomike në shumicën e bizneseve edhe një here e ve në sprovë biznesin e vogël dhe të mesëm pas tërmetit të 26 Nëntorit.

Përshëndesim Bankën e Shqipërisë për iniciativën që ndërmorri në shtyrjen e afatit 3 mujor për shlyerjen e kredive dhe interesave bankare ndaj individëve dhe biznesit, por jemi shpresëplotë që kjo të vihet në zbatim sa më shpejt.

Nga ana tjetër, natyrshëm kjo situatë pritet të sjellë vështirësi të mëdha ekonomike ndaj biznesit në përgjithësi, por sidomos biznesit të vogël dhe të mesëm në veçanti, për arsye sepse biznesi i vogël është më i ndjeshëm ndaj këtyre situatave.

Sot problemet ekonomike varen shumë nga kohëzgjatja e pandemisë. Masat për shëndetin publik kufizojnë dhe dëmtojnë aktivitetin ekonomik. Bizneset vazhdojnë dhe paguajnë shpenzimet fikse megjithëse kanë pezulluar aktivitetin ekonomik.

Në treg ka ndryshime të mëdha të rregullit ekonomik kërkesë-ofertë.

Bizneset do të përballen me krizë parash, rrjedhimisht punëtorët do të ngelen pa punë. Në këto kushte, biznesi është i detyruar ose të marrë borxh para në banka dhe rrugë informale ose të falimentojë.

Lidhja biznes i vogël – biznes i madh do të prishet dhe njëkohësisht  do të shkatërrohen balancat ekonomike.

Pas mbarimit të krizës shëndetësore, ekonomike dhe sociale, frika e biznesit është e madhe nga largimi i punonjësve jashtë shtetit.

Paniku për një krizë financiare do të çojë në një krizë kredie etj.

Të ndodhur në këto kushte e shohim të arsyeshme për t’i kërkuar qeverisë marrjen e disa masave dhe plane veprimi ndërmjet palëve me grupet e interesit, për lehtësimin e barrës fiskale dhe monetare ndaj biznesit.

Duke marrë shembuj nga vendet e prekura nga pandemia, si Franca, Italia, Gjermania, Spanja, Kosova etj.të cilat kanë miratuar paketa fiskale shtesë edhe shteti ynë, duhet të miratojë një paketë ekonomike dhe sociale ku detyrimisht përfshihet biznesi i vogël dhe i mesëm.

Deri në mbylljen e krizës shëndetësore sociale dhe ekonomike kërkojmë:

–              Qeveria të shikojë sektor pas sektori mundësinë e veprimtarisë ekonomike e varur kjo nga situata në të cilën vendi do ndodhet për shkak të pandemisë.

–              Qeveria të krijojë mundësinë e shtyrjes së pagesave, gjobave dhe detyrimeve fiskale të biznesit ndaj shtetit.

–              Rimbursimin e plotë të pagës së punonjësve.

–              Rimbursimin e detyrimeve për derdhjen e kontributeve të sigurimeve shoqërore dhe shëndetësore.

–              Shtyrjen e pagesave të energjisë elektrike dhe ujit si dhe taksave vendore.

–              Për bizneset që pësojnë dëme nga kjo situatë, qeveria të gjejë forma për kompesimin e plotë të tyre.

–              Të përjashtohen bizneset nga taksa e pronës deri në përfundimin e krizës.

–              Të kompesohet e plotë pagesa e qerasë si dhe tatimit në burim i qeradhënësit, për të gjitha bizneset të cilat janë qeramarrës.

–              Të shtyhet për një periudhë të caktuar nga ana e qeverisë deklarimet e bilanceve, për shkak të vështirësive të mbledhjes së dokumentacionit nga ana e kontabilistëve.

–              Banka e Shqipërisë të injektojë para në treg për të ulur efektin e krizës.

–              Zbutjen e normave të interesit duke i krijuar bizneseve mundësi më të mëdha kreditimi.

Në planin afatgjatë, për shkak të krizës si dhe ankimimeve tona të shpeshta për tatime dhe taksa të larta, qeveria duhet të rishikojë edhe një herë një program të një pakete të re fiskale dhe zbutjen e kostove ndaj biznesit. Kjo paketë do t’i krijonte mundësi edhe bizneseve të cilat u dëmtuan nga tërmeti i 26 nëntorit të vitit të kaluar.

Në zbatimin e ligjit në kushtet aktuale, qeveria jo vetëm të ndërmarri masa ndëshkuese për shkelësit e ligjit, por dhe masa lehtësuese që vendi të mos ndodhet para një recension i cili do të sillte falimentimin e mijëra bizneseve dhe largimin e mijëra shqiptarëve drejt perëndimit.

E shohim me vend t’i bëjmë thirrje biznesit të veprojë me rigorozitet ndaj masave të marra nga qeveria, gjithashtu askush të mos abuzojë me çmimet e produkteve dhe shërbimeve dhe urojmë që kjo situatë të kalohet me lehtësi dhe sa më shpejt.

Ju faleminderit për mirëkuptimin !

Për Shoqatën e Biznesit të Vogël dhe të Mesëm të Shqipërisë.

                                                                                   Kryetari

                                                                              Albert Nasto

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.