Taksa e ndikimit në infrastrukturë – Propozohet ulje në 4% për ndërtimet e reja për qëllime zyrash

Këshillit Bashkiak të Tiranës do ti propozohet për miratim ulja e taksës së ndikimi  në infrastrukturë për ndërtimet e reja në masën 4 për qind të çmimit për shitje për m2, nga 8 për qind që është aktualisht.

TV SCAN ka siguruar projektvendimin,  cili sjell ndryshime në vendimin aktual të Këshillit Bashkiak për “Sistemin  e Taksave dhe Tarifave Vendore të Bashkisë së Tiranës” ku  sugjerohet, që “Për ndërtime të reja për qëllime zyrash, taksa për ndikimin në infrastrukturë të aplikohet në masën 4 për qind vetëm në rastet e sipërfaqeve deri  30 mijë metra katror”.

Në relacionin shpjegues, bëhet me dije se ky propozim ka si synim të stimulojë ndërtimet e reja për qëllim zyrash nën njësitë e përcaktuara në këtë vendim,  duke tentuar përqendrimin e qendrave të biznesit në  një hapësirë të dedikuar vetëm për zyra dhe  duke shmangur kështu vendosjen e tyre në strukturat e dedikuara për banim, gjë që sjell edhe paqartësi në taksimin e tyre.

Aktualisht Bashkia e Tiranës ka vështirësi në evidentimin e ambienteve që përdoren për qëllime ekonomike dhe informaliteti në këtë drejtim është i lartë.  Po ashtu, propozohet që kjo taksë të  mos aplikohet më, pas ndërtimit të kësaj sipërfaqeje. Këshilli Bashkiak është parashikuar të mblidhet më 31 Janar, ku do të jenë 10 projektvendime që do të diskutohen, midis tyre edhe shtimi i linjës së parë me autobusë elektrikë në kryeqytet.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.