Tarifat përmbarimore – Rishikimi, kërkohet konsulenca e Bankës Botërore
Ministria e Financave ka kërkuar një opinion nga Banka Botërore për rishikimin e tarifave të shërbimit përmbarimor privat. Udhëzimi i miratuar vitin e kaluar nga ministrat teknikë ka shkaktuar reagimin e ashpër të sektorit bankar.
Që nga muaji qershor, bankat e kanë bojkotuar shërbimin e përmbaruesve privatë dhe kërkojnë ndryshimin e udhëzimit. Sipas tyre, tarifat e vendosura vitin e kaluar janë një barrë për kreditorët dhe bie në kundërshtim të plotë me frymën e ndryshimeve në ligj, duke vendosur tarifa tejet të larta fikse për shërbimin e përmbaruesve.
Kundër këtij udhëzimi janë shprehur hapur edhe Fondi Monetar Ndërkombëtar dhe Banka Botërore, që e kanë cilësuar si pengesë në procesin e ekzekutimit të kolateralit dhe në uljen e mëtejshme të kredive të këqija.
Parimisht, Ministri i Financave dhe Kryeministri kanë mbështetur kundërshtimet e sistemit bankar dhe kanë premtuar rishikimin e tarifave. Për të gjetur një zgjidhje të arsyeshme në vendosjen e tarifave për këtë shërbim, është kërkuar konsulenca e Bankës Botërore.
Raporti i kredive me probleme në fund të nëntorit 2017 zbriti në 14.3%, niveli më i ulët i shtatë viteve të fundit. Megjithatë, pa bllokimin e ekzekutimit të kolateraleve për shkak të konfliktit mes bankave dhe përmbaruesve, ky raport mund të ishte edhe më i ulët.
Ndaj institucionet e specializuara vlerësojnë se rishikimi i tarifave përmbarimore është i domosdoshëm, për t’i dhënë vijimësi uljes së raportit të kredive me probleme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.