Tatimet njoftim për individët: Sot afati i fundit për deklarimin e të ardhurave! Nga nesër, s’ka vetëkorrigjim po penalitet për çdo ditë vonesë
Drejtoria e Përgjithshme e Tatimeve njofton të gjithë tatimpaguesit individë, të cilët kanë pasur detyrimin dhe kanë dorëzuar Deklaratën Individuale Vjetore të të Ardhurave se data 31 Korrik është afati i fundit për të bërë ndryshime/korrigjime në këtë deklaratë.
Gjithashtu data 31 Korrik, është edhe afati i fundit për pagimin e tatimit mbi të ardhurat personale, në rast se ndryshimi i Deklaratës Individuale Vjetore të të Ardhurave rezulton me detyrim për të paguar.
“Pas datës kësaj date, individi nuk ka më mundësi të bëjë vetëkorrigjim të Deklaratës Individuale Vjetore të të Ardhurave. Në rast se Drejtoria Rajonale Tatimore vëren pasaktësi në të, atëherë zbatohen dispozitat e ligjit nr.9920, datë 19.05.2008 “Për procedurat tatimore në Republikën e Shqipërisë”, i ndryshuar, neni 115 “Plotësimi i pasaktë i deklaratës tatimore” në të cilën përcaktohet, si më poshtë, citojmë:
– Dorëzimi i një deklarate tatimore të pasaktë parashikon penalitet në vlerë të barabartë me 0.06% të shumës së detyrimit të papaguar për çdo ditë, gjatë së cilës pagesa nuk është kryer. Në asnjë rast, penaliteti nuk llogaritet për një periudhë më të gjatë se 365 ditë kalendarike.
– Shuma e papaguar e detyrimit tatimor është diferenca ndërmjet detyrimit tatimor, që duhet paguar dhe shumës së tatimit të paguar” njoftojnë Tatimet.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.