Tatimet paralajmërojnë bizneset turistike: Kujdes me deklarimin e TVSH-së! Vetëm fjetja është me shkallë 6%, të tjerat faturohen me 20%

Drejtoria e Përgjithshme e Tatimeve këshillon bizneset turistike që të tregojnë kujdes me deklarimet dhe pasqyrimet e transaksioneve në librin e shitjeve dhe atë të blerjeve.

Duke nisur nga qershori 2017, tatimpaguesit që disponojnë struktura akomoduese deklarojnë TVSH me shkallë tatimore 6 %, vetëm furnizimin e shërbimit të fjetjes përfshirë dhe rastet kur është dhe mëngjesi brenda çmimit të dhomës. Ndërkohë, të gjitha shërbimet e tjera apo mallrat e ofruara nga strukturat akomoduese përveç furnizimit të shërbimit të fjetjes janë të tatueshme me shkallë tatimore 20%, dhe do të evidentohen veçmas në faturë.

“Një njësi akomoduese, e cila ofron edhe furnizime të tjera, siç janë bar-restorant, pishinë, sauna, shezlongje, salla konferencash, do t’i faturojë këto shërbime me shkallën tatimore standarte 20%. Në bazë të ligjit 92/2014, “Për TVSH-në”, i ndryshuar, neni 74 “Kufizimet e së drejtës së zbritjes”, pika ç, strehimi në hotele është një shërbim i përjashtuar nga e drejta e zbritjes së TVSH-së, për këtë arsye, është reflektuar vetëm në librin e shitjes dhe në deklaratën e TVSH-së, duke shtuar rubrikat përkatëse për shitje me shkallë tatimore 6% dhe një ndryshim i tillë nuk është reflektuar në librin e blerjes për ndryshimin ligjor të shkallës së TVSH-së për shërbimin e fjetjes në strukturat akomoduese. Në këto kushte, duke qenë se ky është një shërbim i përjashtuar nga e drejta e zbritjes në blerje, furnizimet e blerjes së strehimit në hotele, do të pasqyrohen në rubrikën “Blerje të përjashtuara” shkruhet në njoftimin e tatimeve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.