Të fundit në Europë për elektriket – Pikat e karikimit të makinave, në Shqipëri vetëm dy

Shqipëria është vendi i parafundit në Europë sa i përket pikave të karikimit të makinave elektrike. Vendi ynë është praktikisht i fundit në kontinent, duke qenë se i fundit në listë është një vend, që në fakt nuk është shtet, ishujt Svlabard pranë polit të veriut.

Studimi thotë se, në vendin tonë ka vetëm 2 pika të karikimit të makinave elektrike, po aq sa në Bosnje Hercegovinë. Sa i përket numrit të makinave elektrike në qarkullim, të paktën në përdorim privat, për Shqipërinë nuk ka asnjë të dhënë.

Makinat elektrike apo edhe ato hibride duket se janë tendenca e re e sektorit automobilistik, që po e përqafojnë edhe vende ku industria tradicionale e makinave është shtyllë kryesore e ekonomisë. Shumë shtete  të botës, kryesisht europiane, po incentivojnë përdorimin e këtyre makinave, për shkak të përfitimeve ambientale e shëndetësore për rrjedhojë.

Disa prej kryeqytete më të mëdha europiane, si Parisi, Londra apo edhe Berlini kanë bërë të ditur se brenda dy dekadave të ardhshme do të eliminojnë tërësisht qarkullimin e makinave që përdorin motor me djegie, duke nxitur kështu përdorimin e makinave elektrike.

Në vendin tonë ndërkohë, diçka e tillë duket mjaft e largët, dhe përdorimi i makinave elektrike, apo hibride është aplikuar deri më tani në mënyrë sporadike për disa mjete të Policisë së Shtetit si dhe, po në mënyrë sporadike, për disa mjete të transportit publik.

Në pjesën dërrmuese të kryeqyteteve europiane, transporti publik dhe kryesisht taksitë, janë mjete elektrike. Në vend të parë në renditje me rreth 22 mijë pika karikimi të makinave elektrike qëndron Gjermania.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.