Të fundit në Europë për kurat inovative. Testet klinike për të sëmurët me kancer, vetëm 0.14 për 100 mijë banorë
Shqipëria është vendi i fundit në Europë për testet klinike mbi të sëmurët me tumor. Të dhënat e studimiit më të fundit të Shoqatës Europiane të Mjekësisë Onkologjike tregojnë se, Shqipëria numëron vetëm 0.14 teste klinike për 100 mijë banorë, nga rreth 11 që raporton vendi i parë i listës në Europë; Belgjika. Testet klinike janë metoda inovative medikamentesh apo trajtimesh për të sëmurët me kancer dhe në Europën perëndimore përdoren gjerësisht.
Diferenca mes perëndimit dhe lindjes së kontinentit të vjetër është mjaft e madhe në këtë aspekt, nënvizon raporti. Raporti thotë, se nëpërmjet këtyre testeve shumë pacientë mund të përfitojnë në fazën e parë, pasi nuk e kanë luksin të presin licensimin dhe rimbursimin e trajtimit. Të dhënat në raport i referohen viteve 2009-2019. Gjatë kësaj periudhe kohore bëhet fjalë për 5787 teste të ndryshme klinike me mbi 18 mijë pacientë. “Kjo diferencë, me më shumë teste klinike për frymë në vendet më të pasura, do të thotë se aksesi në medikamentet inovative nuk është i mundur në vendet më të varfëra”-thotë në lidhje me këtë çështje, Thomas Cerny, profesor i mjekësisë onkologjike në Universitetin e Bernës në Zvicër.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.