Telefonatat e marketingut – AKEP do të ngrejë një regjistër bllokimi
Telefonatat e marketingut janë bërë një shqetësim për mijëra përdorues të telefonisë celulare. Herë pas here, operatorë të kompanive private telefonojnë për të ofruar pajisje kuzhine, dyshekë, madje edhe kredi.
Kjo ndodh pavarësisht se, në shumicën e rasteve, përdoruesit nuk kanë dhënë autorizim që të kontaktohen për qëllime të tilla. Aktualisht, e vetmja zgjidhje është ankesa pranë Komisionerit për Mbrojtjen e të Dhënave Personale.
Megjithatë, Autoriteti i Komunikimeve Elektronike dhe Postare ka një projekt për ta zgjidhur këtë problem. Këtë vit, AKEP do të punojë në ngritjen e një regjistri
“Do Not Call Me (mos më telefono)”, për të rregulluar aktivitetet e telemarketuesve që bëjnë thirrje telefonike të padëshiruara telefonike për individët.
Skema e regjistrimit do t’iu mundësojë përdoruesve që të mos marrin thirrje të pakërkuara nga kompanitë e telemarketingut. AKEP bën të ditur se do të shqyrtojë praktikat më të mira ndërkombëtare për krijimin dhe funksionimin e një regjistri të tillë.
Vetëm gjatë vitit 2017, Komisioneri për Mbrojtjen e të Dhënave Personale dhe të Drejtën e Informimit ka vendosur rreth 10 milionë lekë gjoba ndaj subjekteve private dhe publike që kanë abuzuar me të dhënat personale të individëve.
Pjesa më e madhe e ankesave ka të bëjë me ushtrimin e të drejtës për akses të subjekteve për fshirje të të dhënave personale, vendosjen e kamerave në ambiente publike, marketingun e drejtpërdrejtë në lidhje me komunikimet e pakërkuara, nëpërmjet telefonit ose postës elektronike, etj.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.