Thumanë-Kashar, nisin procedurat për dhënie me koncesion PPP – Do të kushtojë 245 milionë euro
Rruga Thumanë-Fushë Krujë-Vorë-Kashar pritet të kushtojë rreth 245.7 milionë euro dhe do të ndërtohet përmes një koncesioni me Partneritet Publik Privat, ku kompania ndërtuese do të shlyhet pas 13 vjetësh.
Ministria e Infrastrukturës dhe Energjisë ka hapur zyrtarisht procedurat për dhënie e koncesionit, i cili do të bëjë pjesë në projektin “1 Miliard” për infrastrukturën.
Kompanitë e interesuara do të mund të dorëzojnë ofertat deri më datë 11 Qershor, ndërkohë që kompania që propozuar projektin e pakërkuar, “Gener 2”, ka një bonus prej 8.5 pikësh, i cili do të shërbejë si avantazh në këtë garë.
Rruga e re do të nisë nga Thumana, 150 metra në brendësi të autostradës ekzistuese. Gjurma e rrugës vijon me një kthesë djathtas dhe vazhdon e drejtë në fusha deri në afërsi të Fushë-Krujës. Më pas me anë të një kthese të dyfishtë i afrohet Aeroportit të Rinasit. Gjurma e rrugës vazhdon në krahë të djathtë të rrugës automobilistike të Rinasit, deri në lidhjen e saj me Autostradën Tiranë-Durrës në Kashar.
Rruga do të klasifikohet në kategorinë A, pra do të përbëhet nga dy karrexhata të ndara me barrierë sigurie, ku secila do të ketë të paktën dy korsi, bankinë të shtruar në të majtë dhe korsi emergjence në të djathtë. Shpejtësia e projektuar për këtë kategori rruge është 110 kilometra në orë, por Ministri i Infrastrukturës, Damian Gjiknuri është shprehur më herët se kjo do të jetë një autostradë e shpejtë me lëvizje 140 km/h.
Projekti siguron një lidhje të përshtatshme mes veriut të Shqipërisë e Kosovës me Portin e Durrësit, lehtëson trafikun në segmentin Fushë Krujë-Tiranë, si dhe siguron lidhjen më të shpejtë të kryeqytetit me aeroportin.
Pronat që do të preken nga ndërtimi i rrugës do të shpronësohen nga qeveria përpara fillimit të punimeve, ndërkohë që në investimin e këtij projekti do të përfshihen edhe bankat, ku qeveria do të dalë garant.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.