“Tirana Ime Outdoor”, aplikacion për aktivitetet te Parkut i Liqenit. Veliaj: Ka rënë numri i pikave të basteve, shtohet numri i këndeve sportive

“Tirana ime outdoor” është aplikacioni më i ri i Bashkisë së Tiranës, që ka informacion për të gjitha aktivitetet që zhvillohen në Parkun e Liqenit Artificial. Ky aplikacion iu vjen në ndihmë frekuentuesve parkut për të marrë informacion të përditësuar rreth aktiviteteve të shumta kulturore, sportive, argëtuese, në kohë reale, që zhvillohen në kodrat e liqenit.

Kryetari i Bashkisë së Tiranës, Erion Veliaj në fjalën e tij tha se Parku i Madh i Liqenit ka marrë një jete tjetër.

“Kemi bërë një ndarje të funksionit: në qoftë se aplikacioni Tirana Ime është mbledhës i halleve të qytetit, duam që Tirana Ime Outdoor të jete hormoni që injekton një tjetër lloj pasioni për gjërat e bukura të qytetit, jo më për hallet, për pusetat, për plehrat dhe për gjithë problemet që mund të kemi, por donim të kishim një aplikacion të qejfit. Aplikacioni ka një menu, sigurisht në shqip edhe në anglisht”, tha Veliaj.

Veliaj deklaroi se falë përmirësimit të infrastrukturës sportive dhe rritjes së numrit të organizimeve të ndryshme social-kulturore, është ulur dhe numri i atyre që frekuentojnë kafenetë apo bingot.

“Ne kemi 10 mije kafe dhe pika bastesh në Tiranë dhe për herë të parë ka rënë numri i pikave të basteve dhe është rritur numri i këndeve të lodrave dhe i këndeve sportive. Kjo është ajo që quhet pika e kthesës, ku qyteti po kthen dhe nga ambicia e dikujt që të rritet. Nuk ka rëndësi bindjet politike,  për kë votuam, unë besoj se ky instrument i jep tani shpejtësi tjetër kësaj pike kthese dhe unë jam këtu që t’i hap luftë kafeve”, tha kryebashkiaku.

Kryetari i Bashkisë u ndal dhe në Maratonën e Tiranës, ku ftoi të gjithë qytetarët që të regjistrohen dhe të nisin përgatitjet për të marrë pjesë në garën e 15 tetorit.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.