Tkurret lehtë huaja për ekonominë – Rritet për individët, tetori konfirmon tendencën e nisur që në gusht

Të dhënat më të fundit nga Shoqata Shqiptare e Bankave, tregojnë se, për muajin tetor, kreditimi është tkurrur lehtë, si për individët ashtu edhe për kompanitë, publike apo private. Huaja e re gjatë muajit tetor fiksohet në rreth 20.6 mld lekë, nga rreth 20.7 mld lekë që ishte në muajin shtator të këtij viti. Një vit më parë ndërkohë, gjatë së njëjtës periudhë kohore, huatë e reja fiskohej në 21.7 mld lekë.

Vlera totale e huasë së re përfshin kredinë jo vetëm në lekë, por edhe në valutë. Po të shohim vetëm kredinë për individët ndërkohë, gjatë tetorit, huaja e re rezulton në rreth 5.9 mld lekë, nga rreth 6 mld lekë e muajit paraardhës, ndërkohë që në tetorin e një viti më parë fiksohej në rreth 5.5 mld lekë. Pra, sipas shifrave zyrtare, tendenca e individëve për të marrë kredi është rritur gjatë tetorit të këtij viti, krahasuar me të njëjtën periudhë të një viti më parë.

Tetori konfirmon kështu tendencën e nisur që në muajin gusht për kreditimin e individëve. Gushti shënoi kështu kthesën, me shifrat në rritje krahasuar me një vit më parë, ndërkohë që të gjithë muajt paraardhës, huaja e re për individët ka rezultuar në rënie krahasuar me një vit më parë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.