Tragjedia e Zvërnecit ku humbën jetën 3 të rinj – Gazetari, thirrje për kujdes: “Zona ka rryma të forta”

Tragjedia e ditës së djeshme në gjirin e Porto Novës në Zvërnec të Vlorës, ku humbën jetën tre persona ka sjellë edhe reagimin e gazetarit Enrik Mehmeti. Si një njohës i mirë i zonës, ai ka dashur të paralajmërojë të gjithë pushuesit që bëjnë plazhin në atë zonë.

“Të keni shumë kujdes nëse nuk jeni notarë të sprovuar. Në atë zonë shpesh ka rryma shumë të forta që të tërheqin drejt thellësisë. Të gjithë ata që nuk janë notarë me rezistencë të lartë ose që nuk e njohin mirë detin, të mos shkojnë më thellë se sa niveli i gjoksit të tyre”, shprehet ai.

Sipas tij, ky është një fenomen që ndodh edhe në zona të tjera dhe është një nga shkaqet kryesore për mbytjen e njerëzve në det. Kryesorja, thotë Mehmeti, është të ruhet qetësia dhe të mos kapen nga paniku.

Edhe nëse rrymat detare janë shumë të forta, ato do t’ju largojnë vetëm disa metra larg. Nga aty, pushuesit në rrezik mund të mbledhin fuqitë dhe të notojnë me zig-zage në drejtim të bregut.

Ditën e djeshme rreth orës 14:30, dy vajza shqiptare dhe një djalë nga Tetova humbën jetën duke tentuar të shpëtojnë njëri-tjetrin. Sakaq ekspertët i kanë bërë thirrje qeverisë të vendosë sa më parë tabela parandaluese në zona të tilla të rrezikshme dhe të vendosë kulla vrojtimi për të monitoruar plazhistët në vështirësi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.