Turizmi nuk rimëkëmbet as këtë vit – S&P: Shqipëria, vendi më vulnerabël në rajon. PPP rrezik për notën e borxhit

Raporti i zgjeruar i Standard and Poor`s për ekonominë shqiptare analizon rimëkëmbjen e pritur ekonomike gjatë këtij viti por edhe aspekte të tjera. “Shpërndarja e vaksinave, politikat akomoduese fiskale dhe monetare, si dhe lehtësimi i masave shtrënguese të lëvizjes së njerëzve do të mbështesin rimëkëmbjen”-thotë Agjencia e vlerësimit të kreditit. Sa i përket notës së borxhit, S&P thekson se, mund te ketë një ulje të saj në rast se, përkundër pritshmërive të vetë institucionit, financimi i deficitit të jashtëm të Shqipërisë, do të bëhej më pak i sigurt, duke ushtruar presion mbi rezervat. Ndër të tjera, ne mund të ulim notën, në rast se stoku i borxhit i qeverisë vazhdon të rritet, si pasojë  materializimit të detyrimeve të prapambetura nga partneritetet publike private (PPP)”-citon mes reshtave agjencia. Nga ana tjetër, S&P parashikon rritje të notës së borxhit sovran në rast se, autoritetet do të implementojnë reforma të cilat të përmirësojnë në mënyrë thelbësore klimën e biznesit si dhe të menaxhimit të risqeve fiskale, në një kohë që investimet e huaja direkte rriten dhe ekonomia tkurret.

Sa i përket panoramës së ekonomisë shqiptare, agjencia nënvizon se, karakterizohet nga një kornizë institucionale e dobët si, nivele modeste të ardhurash, si dhe borxh të lartë qeveritar në valutë të huaj. Nga ana tjetër, vlerësimit mbështeten nga perspektiva e rritjes ekonomike, regjimi i lirë i kursit të këmbimit dhe rezervat ndërkombëtare të Bankës së Shqipërisë, të cilat luajnë një rol të rëndësishëm.

Ndër të tjera, në raport, agjencia vë theksin te fakti se, Shqipëria është vendi më vulnerabël në rajon nga goditje të mundshme që lidhen me sektorin e turizmit. Ky sektor gjatë këtij viti, parashikon se, nuk do të mund të kthehet dot në nivelet e vitit 2019.

Raporti rezervon disa reshta edhe për zhvillimet politike, duke nënvizuar se, ndryshimet e njëanshme në kodin zgjedhor, pritet të sjellin një parlament më të fragmentarizuar pas zgjedhjeve të muajit prill.

Roel Korkuti / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.