Unaza e Madhe e Tiranës, 445 milionë lekë për shpronësimin e pasurive të paluajtshme ku do të kalojë Unaza Lindore

Këshilli i Ministrave vendosi ditën e mërkurë për shpronësimin për interes publik të pronarëve që preken nga ndërtimi i Lotit të tretë të “Unazës Lindore” të Tiranës. Vendimi vjen vetëm pak ditë pas përfundimit të lotit të parë të Unazës Verilindore, nga rrethrrotullimi i TEG deri tek Reparti i Helikopterëve në Farkë.

Loti i tretë prek rreth 54 pronarë e shoqëri që janë të vendosur në zonën nga ish-Uzina e Autotraktorëve deri në Bregun e Lumit.

Trualli dhe banesat që do të kompensohen në vlerë të plotë, kapin vlerën totale prej 445,657,671 lekëve. Kjo shumë do të përballohet nga llogaria e veçantë për shpronësimet në Ministrinë e Financave dhe të Ekonomisë.

Menjëherë pas çeljes së fondit të përcaktuar më sipër, do të nisë edhe likuidimi i pronarëve, të cilët janë konfirmuar nga ZVRPP dhe kanë dorëzuar vërtetimin e hipotekës dhe certifikatën e pronësisë.

Ndërkohë, derisa të bëhet procesi i kalimit të pronësisë për pasuritë e shpronësuar, do të pezullohen të gjitha transaksionet me këto pasuri të paluajtshme.

Gjatë inaugurimit të lotit të parë, ministri i Infrastrukturës dhe Energjisë, Damian Gjiknuri, u shpreh se puna për ndërtimin e unazës së jashtme të qytetit, me një kosto totale prej 12.3 miliardë lekësh, do të kërkojë edhe disa vite kohë.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.