Vendimi/ Krijohet Agjencia Kombëtare e Ujësjellës-Kanalizimeve dhe Infrastrukturës së Mbetjeve – Do të jetë nën varësinë e MIE

Këshilli i Ministrave ka miratuar ditën e sotme vendimin për krijimin e Agjencisë Kombëtare të Ujësjellës-Kanalizimeve dhe Infrastrukturës së Mbetjeve. Zbatimi i politikës specifike shtetërore në sektorin e ujësjellës-kanalizimeve, trajtimin e ujërave të ndotura dhe planifikimin territorial dhe infrastrukturën e mbetjeve është edhe misioni kryesor i kësaj agjencie.

Referuar vendimit, Drejtori i Përgjithshëm i këtij institucioni do të emërohet nga ministri përgjegjës për çështjet e infrastrukturës, ndërsa struktura dhe organika e AKUM-së miratohen me urdhër të Kryeministrit. AKUM do të ushtrojë një sërë kompetencash, që përfshijnë:

• Propozime mbi ndryshimin dhe përmirësimin e kuadrit ligjor e nënligjor në sektorin e ujësjellës-kanalizimeve, të trajtimit të ujërave të ndotura, planifikimit territorial dhe infrastrukturës së mbetjeve.
• Përgatitje të planifikimit e nevojave për investime për ndërtimin/rehabilitimin/zgjerimin e sistemeve të përmendura më sipër
• Përgatitje për metodologjinë dhe kryen shpërndarjen e subvencioneve të planifikuara në buxhetin e shtetit për këto sektorë
• Po ashtu, do të ushtrojë kontrolle teknike në çdo subjekt dhe ofrues të këtyre shërbimeve në sektorët që përfshin kjo agjenci, etj

Me hyrjen në fuqi të këtij vendimi pas botimit në ‘Fletoren Zyrtare’, Agjencia Kombëtare e Ujësjellës-Kanalizimeve (AKUK) ristrukturohet në Agjencinë Kombëtare të Ujësjellës-Kanalizimeve dhe Infrastrukturës së Mbetjeve.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.