Kosova në krizë energjetike – Kurti: Çmimi në bursë është shtatëfishuar nga 70 në 515 euro
Nëpërmjet një njoftimi të publikuar në faqen e tij zyrtare, kryeministri i Kosovës Albin Kurti ka konfirmuar se Kosova është në krizë energjetike ku ka cilësuar si pasojë e faktorëve të jashtëm si çmimet e larta të importit si dhe faktor të brendshëm dobësimin e kapaciteteve.
“Në njërën anë, çmimi i energjisë në bursë është shtatëfishuar: ishte rreth 70 euro për Mwh në kushte normale, kurse me 21 dhjetor mbërriti deri në 515 euro! Në anën tjetër, as gjysma e konsumit te ne nuk mbulohet nga prodhimi: kërkesa ka arritur pikun historik me 1,4 GW, ndërsa në rastin më të mirë (deri sa ta riparojmë bllokun B2 me fuqi prej 255 MW) termoelektranat tona gjenerojnë as 650 MW!”, është shprehur Kurti.
Ne fjalimin e tij Kurti gjithashtu është shprehur:
“Në këtë situatë nuk ka zgjidhje të mirë: ose reduktime të energjisë, ose shtrenjtim të energjisë? Shumë më herët, Kosova është dashur të mendojë më shumë e më mirë, që të mos përfundojë në këtë gjendje të keqe.
Janë dy faktorë të brendshëm që na kanë sjellë në këtë krizë. Mungesa e vizionit për zhvillim socio-ekonomik të Kosovës, me planifikim të sektorit energjetik për furnizim të qëndrueshëm dhe çmime të përballueshme, si për amvisëritë ashtu edhe për industrinë. Së dyti, korrupsioni qeveritar i bërë zakon, e që kulmoi me privatizimin e rrjetit të shpërndarjes dhe furnizimit për vetëm 26 milionë euro.
Gjatë këtyre dy dekadave, projektet e ndryshme pa strategji afatgjate nuk kishin si të mos dështonin. Në vitin 2022 ne do të kemi strategjinë nacionale energjetike për dekadën në vijim, dhe shtigjet ku duhet ecur drejt vitit 2050.
Unë dhe ministrja e ekonomisë Artane Rizvanolli jemi në komunikim të rregullt me KEK-un, KOSTT-in dhe ZRrE-në. Me shtimin e likuiditetit dhe subvencionimin e importit kemi arritur të stabilizojmë furnizimin dhe reduktimet pothuajse janë hequr.”
Kurti ka kërkuar mbështetjen e qytetarëve si dhe ju ka bërë thirrje të tregohen të kujdesshëm përsa i përket kursimit dhe shpenzimit të energjisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.