117 raste të reja me COVID-19. Ministria e Shëndetësisë: 4 humbje jete dhe 44 të shëruar

Vijon të jetë i lartë numri i të infektuarve me Covid-19 në vendin tonë. Sipas Ministrisë së Shëndetësisë, vetëm në 24 orët e fundit janë evidentuar 117 raste të reja nga kryerja e 507 testimeve, ku Tirana mbetet qyteti me numrin më të lartë të të prekurve, e ndjekur nga Durrësi dhe Kukësi.

“Nga 507 testime të kryera në 24 orët e fundit janë konfirmuar 117 raste pozitive, ku Tirana mban numrin më të lartë të të prekurve. Shpërndarja gjeografike e rasteve është si vijon: 58 raste në Tiranë, 12 në Durrës, 8 në Kukës, nga 7 raste në Krujë, Korçë, 5 në Shkodër, nga 3 raste në Vlorë, Divjakë, nga 2 raste në Fier, Has, Klos, dhe nga 1 rast në Kurbin, Lezhë, Kavajë, Lushnje, Mat, Gjirokastër, Malësi e Madhe, Bulqizë.”

Sipas ISHP-së, gjatë 24 orëve të fundit nuk kanë arritur ta fitojnë betejën me sëmundjen katër qytetarë.

“Në 24 orët e fundit kanë humbur betejën me koronavirusin 4 persona në spitalin Covid 2 “Shefqet Ndroqi”. Një 84 vjeçare nga Shkodra, një 75 vjeçar nga Tirana pa sëmundje të tjera. Si dhe 2 qytetarë nga Tirana: një 78 vjeçar dhe një 82 vjeçar, me sëmundje bashkëshoqëruese.”

Ndërkohë numri i të shëruarve gjatë 24 orëve është 44, teksa në spitalin Infektiv dhe në spitalin “Shefqet Ndroqi” po trajtohen 123 pacientë, 22 janë në terapi intensive dhe 7 pacientë në intubim.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.