“75 mijë lekë në muaj, taksa për Bashkinë” – Këshilltari Bashkiak i PD: Rëndon mbi çdo familje në kryeqytet
Anëtari në Këshillin Bashkiak të Tiranës nga radhët e Partisë Demokratike, Akil Kraja, ka denoncuar përmes një deklarate nga selia e PD, rritjen e barrës së taksave për banorët e kryeqytetit.
“Më shumë taksa përkthehet në një faturë që kushton të paktën 75 mijë lekë në muaj. Kjo rritje taksash është dhurata e fundvitit që Erion Veliaj u bën qytetarëve të Tiranës”, tha Kraja.
Sipas tij, rritja e taksave ka qenë një politikë e ndjekur edhe më parë nga kryebashkiaku, por në buxhetin e miratuar për vitin 2018, shuma e mbledhur shkon nga 55 milionë euro në 100 milionë euro.
Në vijim, Kraja shpjegoi edhe rritjen në faturë, më vete sipas secilit zë, duke folur në lekë të vjetra.
“Uji i pijshëm është rritur me 50%, nga 10 mijë lekë, tani do të paguajnë 15 mijë lekë në muaj. Tarifa e shërbimit është rritur 100%, nga 1 mijë lekë do të bëhet 2 mijë lekë. Në faturën e UKT-së shtohet edhe taksa e ndërtesës, e cila është rritur 10-fish, nga 1 mijë lekë në muaj aktualisht, mesatarisht do të paguajmë 10 mijë lekë në muaj. Tarifa e pastrimit, 4200 lekë, taksa e arsimit është një taksë e shtuar së fundmi, 1500 lekë në muaj.
Në faturën e shtuar 75 mijë lekë në muaj përfshihet edhe kostoja e një aboneje autobusi, që është rritur 50%. Më parë ajo kushtonte 12 mijë lekë, tani do të kushtojë 16 mijë lekë në muaj. Pjesë e shtrenjtimit të jetës në Tiranë është edhe pagesa për parkingun në rrugët e Tiranës, që për çdo automjet familjar, mesatarisht kosto shkon 15 mijë lekë në muaj. Në faturën familjare përfshihet edhe tarifa mujore prej 10 mijë lekësh mesatarisht e mirëmbajtjes së pallateve”, shpjegoi Kraja.
Anëtari i Këshillit Bashkiak e quajti një taksë të rëndë për t’u paguar nga familjet shqiptare, e cila rëndohet edhe nga pesha e faturave të tjera.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.